絲絲講場：日本城阿妹ELLA賣精品

「日本城」家品店喺香港家傳戶曉，最近佢多咗個阿妹「123 by ELLA」。因為佢「阿媽」國際家居零售（01373）喺一四年收購咗精品店「ELLA」，舊年年底仲幫佢改咗新名新形象，仲搞埋快速時尚店！

國際家居零售副主席魏麗霞（Lisa）介紹，「123 by ELLA」嘅貨品以潮流飾品為主，做到最快上架時間只需要10日，啱晒乜都要快嘅香港人。而且店內設計簡約，以價錢劃分唔同貨品區域，例如會分10蚊、20蚊，以至過百蚊不等，等大家濕平得更方便喎。

講到呢個店名相當得意，原來個原創者係Lisa本人。佢話自己去旅行時見到呢個Concept好正，覺得好啱香港市場，所以引入嚟試下，點知市場反應好好，生意好過以前好多，所以佢哋對呢個副線都非常有期望咁話，仲計劃三年內開夠100間添。

至於「日本城」今年已經25歲，公司乘機搞埋概念店，仲目標至明年四月底止嘅財政年內概念店開到10間，涉資成千萬咁多o架，睇嚟公司對香港零售前景仲好有信心囉！

余絲韻