絲絲講場：翠華3年半即棄「1314」？

翠華（01314）光環不再，上市三年半就賣盤？唔通世界真係無所謂嘅「一生一世」？咁啱翠華個老冧都因為叫「1314」，成為一時佳話！話說翠華尋日開市前停牌，出通告話涉及收購合併，當初都唔知佢係買嘢定賣嘢呢？

結果喺夜晚開估，公司再出通告話控股股東翠發、恩盛及騰勝獲獨立第三方洽購控股權，尚未訂立任何具法律約束力嘅協議。三方合共持有8.78億股，即62.28%股權。翠華搞到咩田地要賣盤？睇吓佢個股價走勢同業績咪明！

呢間曾經係內地遊客嚟香港必試嘅貴價茶記！翠華一二年十一月上市後一年，股價輾轉升近150%到最高峰5.63元。之不過一四年打後，翠華股價就好似瀡滑梯咁，一路向下。停牌前收市價1.37元，比最高峰回落75%之多，連當年招股價2.27元都穿埋。

計番條數，依家市值19億元，換言之由高位蒸發咗58億元，直頭等於「蒸走」一間大快活（00052）有多o架（目前市值43億元）！

前幾年受惠個人遊旅客，翠華上市後盈利係咁升，但舊年深圳宣布個人遊只可一周一行之後，翠華截至今年三月底止嘅一六財年業績錄上市以來第一次倒退，跌超過五成！想知賣盤係力挽狂瀾，定一沉百踩，睇今日復牌嘅股價表現，就自有分曉！

余絲韻