地上最強i-bank（投資銀行）係邊間？摩通？高盛？大摩？錯！錯！錯！答案係滙豐。
滙豐日前獲《歐洲貨幣》評為「全球最佳投資銀行」，讚揚佢哋業務多元化、喺新開拓市場具領導地位、唔單止涵蓋資本市場。不過據絲絲所知，i-bank一向唔算係滙豐至標青嗰花瓣，典解今次咁威威？
近期中國企業「走出去」，頻頻見到滙豐身影，最矚目嘅要數中化集團豪擲430億美元競投瑞士農業巨企Syngenta，滙豐唔止以Lead Adviser幫中化揮低孟山都，順手搞埋過渡貸款。全靠呢單勢成中資歷來最大併購，滙豐喺中國併購市場由前年十名唔入，飆到上第二，最多可以勁袋成9,500萬美元。
除全球最佳i-bank外，滙豐同時獲《歐洲貨幣》封為「亞洲最佳融資銀行」、「香港最佳銀行」同「香港最佳投資銀行」，叻叻。
余絲韻