絲絲講場：期貨王婆婆100萬炒出52億

模擬比試打低2000人

話說耀才證券金融（01428）搞咗個《耀才期貨擂台比武》，第二回合已經鬥完，結果就畀Linda婆婆捧走咗個「耀才期貨王」寶座。聽講呢輪第二回合高手雲集，有成近2,000名高手比試期貨功力，戰況比第一回合更激烈，換言之有近2,000人今回畀Linda婆婆Fight低咗。

鬥足三個月 獎金2.5萬

事實證明，講到博講到辣，女人絕對唔可以睇小，事關今回唔單止冠軍係女人，連亞軍都係女人包辦。亞軍女士成績亦唔講得笑，100萬元本三個月內炒出27億元！

放心，男士仍然有「定」企。季軍係位男士，成績係100萬本三個月炒出5,500萬元，都唔錯啦。

雖然比賽只係模擬交易，唔係炒真錢，冇52億落袋，但贏出一樣有錢收，女期貨王Linda婆婆就即捧走現金獎2.5萬元，亞軍可以袋走1.5萬元現金獎，季軍都有1.2萬元。

100萬炒出52億嘅秘訣？關唔關英國公投脫歐後恒指大瀉事呢。

話時話，唔係炒真錢、唔係自己錢、炒燶冇後果、炒贏有錢袋，畀着絲絲平日明明《其後》三千代咁溫婉，都打大赤膊辣妹上身瞓身博。三千代同《其後》係乜？齋講你唔會明，自己上網Check。

余絲韻