絲絲講場：比卡超慌忙搶註商標
任天堂個新手機遊戲《Pokémon GO》上周喺美國、澳洲同新西蘭出咗後，洋人網幾乎洗版，乜都關隻「比卡超」事，膩到呢！但有段消息，絲絲覺得格外清新，就係任天堂快快手已經喺內地入紙申請《Pokémon GO》商標註冊。見識過New Barlun同iPhone「抄」國產手機呢兩件不可思議，任天堂明顯學到嘢。
華兩單裁決嚇親人
國際知名品牌喺內地不時爆發商標與專利之爭，絲絲每次聽落都似聽緊鬼古。早排你識絲絲識嘅New Balance，竟然被內地法院裁定侵犯咗內地間New Barlun個「新百倫」商標權，New Balance仲要賠近億元人仔！仲有再勁啲嘅，iPhone 6和iPhone 6 Plus外觀設計，被北京知識產權局裁定抄國產手機。
今次任天堂擺明唔敢睇小中國市場嘅文化，即使《Pokémon GO》入唔入到中國都仲未確定，但為免領嘢，任天堂已經向內地國家工商總局商標局申請定《Pokémon GO》商標註冊，用途主要為娛樂類。嗱，依家只係申請階段，批唔批？未知。點解內地未有得玩《Pokémon GO》？事關要用Google帳戶開玩家帳戶，但內地防火牆封鎖咗Google，咁點登入個Game啫！就算有辦法登入到，佢哋唔開放內地嘅全球定位系統信號，一個冇小精靈嘅地圖，有鬼用！
任天堂得比卡超帶挈，喺日本嘅股價一路升，由上周四《Pokémon GO》推出起計，股價至今已累升近七成！唔知仲有幾耐升呢？
余絲韻