孖妹S檔案：揸收息5寶 唔怕差錯腳

S：專業投資者 Starman

（風險指數以五粒＊為最高）

REITs回報穩 好過買樓收租

彩兒：你近三個月以嚟利用收息工具賺咗過百萬回報，REITs幫你唔少？

S：個人比較鍾意REITs，好似領展（00823）咁，隨街喺商場、舖都可以睇到佢嘅業務係點，肉眼睇到，貼近少少。另外，置富產業信託（00778）、越秀房託（00405）等大眾容易接觸到公司資訊嘅REITs都係我首選。因為房託基金相比起自己買樓、買舖收租方便，門檻低好多，每年回報率亦有一定保證，再者，因應市場資金近月買債避險，推高債價，所以我已沽出部分債券，轉投REITs懷抱。

以現時市價而言，唔少REITs年收益率可達6至8%，係唔錯嘅選擇，主因買物業收租要交稅、又要搵租客，需要物業投資知識。不過，房託基金有規模經濟（Economies of Scale），持有一籃子的商舖或商廈，亦有資金去優化，REITs的負債比率雖然會低於40%，佢自己已經會做融資，其實已包含槓桿；加上我喺私人銀行或部分機構做投資，亦有提供低息（不高於2厘）按倉服務，故起到雙重槓桿嘅效果，喺呢個情況下，每年回報有十幾厘唔係難事，亦具防守性。

專業投資者Starman表示，已沽出部分債券，轉投REITs懷抱。

恒生李佩珊表示，認購基金前，可先到銀行做評估。

星信託物業租戶穩

Kitty：投資REITs都有承受波幅，好似隻越秀房託喺一一年就跌咗兩成，但拉長就幾好賺，過去三年，累積總收益逾三成，領匯期內總回報仲超過五成添。但係香港嘅REITs我哋都見慣晒啦，有冇啲私伙好嘢分享吓？

S：持有九龍塘又一城嘅新加坡REITs豐樹大中華商業信託（新交所：RW0U），有7至8厘股息率，都係我嘅投資之一，又一城嘅租約一般只係兩、三年期，但勝在租戶穩定，租金回報增長唔錯，所以喺市況唔明朗，睇唔透嘅情況下都係好選擇。雖然佢喺新加坡上市，但主要資產係位於香港，呢隻REITs一般香港證券行都可以買得到，尚算方便，不過要留意，需要將資金兌換成新加坡幣先入到市喇。

風險指數：＊＊＊

揸企業債 進可攻退可守

Kitty：債券門檻高，唔係個個玩得起，聽聞你都係債主。

S：債券普遍需要20萬美元（約156萬港元）入場費，證券行先受你玩，買企債好處係債價升，你可以資本增值，如果持有至到期，亦可賺息，拎番本金。

個人比較鍾意兩至三年期、較短年期嘅債券，因即使係一啲較大嘅企業債券，都會有5至6厘年回報，若買入後將佢抵押番畀銀行，套現再買債券，喺槓桿方式投資下，年回報可達8至10厘。不過，要留意，由於近期債價升咗唔少，所以債息已相應下滑。

我唔建議買長年期債券、永續債或CoCo Bonds（應急可換股債），前兩者長年期，後者唔保本，多數每半年派一次息，長期睇，若未來幾年面對加息，或有較好收息產品，債價或波動，若有做槓桿，會有補倉風險。

評級高 違約風險低

彩兒：有啲企債成十幾厘息，愈高息愈好？揀乜行業好？

S：行業視乎唔同投資者需要，高息債券主要集中喺內房債，但恒大（03333）負債高企，我傾向避開，反而其他資產狀況好啲嘅，碧桂園（02007）、雅居樂（03383）同世茂房地產（00813）值得考慮，6至7厘債息尚算合理，有8至10厘息嘅債券，就要留意公司面對嘅風險。

內房企債券前景始終受制於內地房地產市場，若想配合槓桿式投資，就要預留資金應付突發性補倉嘅需要，如資金鏈斷裂，費事最終被強制斬倉。

S：評級較高嘅企債，如長和（00001）發行嘅債券雖債息較低，若想配合槓桿式投資，揀呢類違約風險較低嘅企債，個心會定啲。

風險指數：＊＊＊

銀色債券包有2厘 勝存銀行

彩兒：做咗咁耐冇腳嘅雀仔，我都有啲厭，有啲想停落嚟，每日短炒嘅生活都捱唔到好多年！

Kitty：第一批由政府推出嘅銀色債券（Silver Bond）應該今個月底會接受認購，市傳同iBond認購方式差唔多，可經21間配售銀行認購，亦係與通脹掛鈎，以市場預期香港通脹有2%多啲，好過放喺銀行好多，最正係有2厘包底，但就冇二手市場，只可原價賣番畀政府，幾啱你喎！

彩兒：你係咪想死啊？銀色債券係畀65歲以上人士申請（口架）！

風險指數：＊

李：恒生銀行投資產品及顧問業務主管 李佩珊

債券及高息股基金分散風險

彩兒：我有朋友想買高息股同債券，花多眼亂唔知點揀好，但又話自己窮到燶喎。

李：佢可以考慮定期派息嘅基金，包括高息股基金同債券基金，呢類基金投資一籃子債券或高息股，可以起到分散風險嘅作用。投資債券基金同直接持有債券嘅最大分別係，你未必清楚知道基金持有債券嘅發債機構，同埋債券到期日細節，亦冇保本嘅概念，不過，喺市況不明朗下，都係一個好選擇，我睇到投資基金公會報告話，睇番五月份，有約74%基金銷售額係買入高息股或債券基金，所以近期真係好Hit。

月供基金千元可玩

Kitty：我知道落銀行可以認購，但記得錫住我個荷包呀。

李：其實應該落銀行做番個評估，睇吓基金風險評級切唔切合個人風險承受能力，亦要留意基金月報所講嘅投資策略，過往基金表現，投資信貸評級分布等。

李：銀行一般基金入場門檻係2萬元，認購費係1.5至2%；我哋銀行亦提供網上基金戶口服務，入場門檻低至3,000元，仲係唔夠錢嘅話，大可以揀月供基金，最低月供1,000元。

風險指數：＊＊

公用股高息 中電3厘和味

Kitty：坐定粒六穩袋高息係唔少姊妹嘅夢想，但現實邊有咁理想？

彩兒：做到恒指成分股嘅，都唔係冇風險，如高息股滙控（00005）有逾8厘股息率，但佢最受制於英國脫歐事件發酵，股價未來有機會繼續玩過山車，都唔知會唔會賺息蝕價，一場空！

Kitty：不如追求啲「生活淡淡似是流水」，派息時先「泛起漣漪」嘅股份？好似隻中電（00002）咁，今年上半年升逾21%，冠絕一眾指數成分股，仲有逾3厘股息率，買咗真係財息兼收。

風險指數：＊＊

若有料報畀彩兒同Kitty或有嘢問，可電郵money.biz@on.cc

彩兒 Kitty