又到實習季節！做緊或者即將做Intern（實習生）嘅你，有冇諗過實習分分鐘變長工。點至上到位？以下15招返新工的你，一樣啱使。
1）做好準備：溫吓公司及行業資料，Search埋公司最近有咩新聞。
2）當正職做：想人認真對你，先要認真對份工。無論咩職位，你嘅貢獻（或錯誤）都影響到公司與同事，唔好睇小自己嘅重要性。
3）人靠衣裝：要着到好似你想上嘅位，而唔係你做緊個位，唔好Casual咗。
4）執多套衫：擺多條呔或對高跟鞋喺公司，事關你唔知幾時會被「臨危受命」出席重要會議或酒會。
5）唔識要問：一個人唔識得晒所有嘢。不過，問過嘅就記住，唔好問完又問。
6）管好時間：唔好一次過攬太多嘢上身，做唔切要提早同人講，唔好死頂完後又趕唔到Deadline。
7）學會適應：唔同人有唔同做事與溝通方法，學會適應。
8）建立人脈：唔係齋Social或吹水，而係與同事建立更有質素嘅關係。
9）帶眼識人：建立人脈之餘亦要保護自己，唔好咩都話晒畀人知。
10）拜師學藝：向上司或同事請教經驗。你敢問，就有得學。
11）要聽指引：自告奮勇係好，但唔好爭嚟做，做好一、兩樣，好過孭得多但冇樣妥。仲有，就算有自信，實習係學嘢，要聽人指引。
12）要識拒絕 ：做Intern或新人，預咗要做啲好悶嘢，但若真係畀人搵笨，要識拒絕，你係去實習，唔係去做水魚。
13）挑戰自我：試啲自己未做過嘅嘢，豐富自己嘅Portfolio。
14）記低成果：方便日後求職。
15）主動詢問：主動定時問吓人，到底自己做成點，睇清自己強項與弱項。
余絲韻