Market Insight：憧憬量寬 有利市況

英國股市於英國公投前夕企在6,338點水平，爆冷脫歐下，一度落到5,788點，消息經幾日發酵，上周五已高見6,587點，比公投前升凸3.9%。本來公投不明朗因素早就困擾英股一段時間，就算同歐盟決裂要傾「離婚」，好好醜醜都算係有個交代。

再者，在全球鬥貨幣貶值，以刺激經濟及驅逐通縮的潮流之下，英國多得脫歐，令英鎊眨眼間貶值一成，英國資產及經濟競爭力反而因禍得福，水漲船高。

唔信你睇吓歐盟兩個老大哥，德、法股市雖然經過反彈之後，比英公投前仲要低4.7%及4.3%，要同英國各走各路，英國定歐盟比較頭痕？睇吓股市投資者用腳投票的結果，就一清二楚。

港股假期前，趁歐美股市反彈，半年結基金粉飾櫥窗，加埋路邊社傳緊七一會拍板深港通年底通車，大舉挾淡，恒指升358點收報20,794點，期指日市更炒到153點高水，逼淡友埋到牆角。

北水南來應有所圖

假期間，綜觀各方因素，歐洲股市未肯停，內地經濟數據麻麻，個市會唔會掉轉頭炒人行短期再放水？暫時睇都係五五波，加埋深港通未有下文，唔排除挾淡高潮過後，港股短期需要回一回。

但要留意，上周中開始全球國債孳息急挫，上周五美債息落過1.41厘，返回一二年中低位附近。

英擇選脫歐後，聯儲局短期加息機會大減，環球經濟不確定性增加，似乎個市開始炒緊英、歐、日、美央行會再一次擴大（美國是重推）量寬規模。

古勝第一個諗法是買金、買磚頭、買高息股同金礦股。本地地產股及公用股之中，除了本地地產股尚算落後，有較佳值博率之外，在進入調整期，相對落後的整個中港股市，似乎下半年都唔需要睇得太淡，近期北水南來密密吸，看來不是無的放矢。

中國海外（00688）在三月向中信股份（00267）收購物業資產，上周出通函進一步交代交易詳情。值得留意是，中信目標組合擁有大約3,155萬平方米的土地儲備，收購項目分布在逾20個城市，大部分位於一二線城市，中海的土儲即時增加，最重要係唔使捱貴地。

內房板塊短炒為主

通函一出，隨即獲多間大行唱好，其中大摩指收購可提高中海每股資產淨值10%以及股本回報率，維持給予「增持」評級，目標價睇36元，意味現價有四成七的上升空間。中海股價上周四急升6.3%，刺激內房板塊做好，華潤置地（01109）升4.8%，因股權爭奪戰持續而連跌五日的萬科（02202）亦反彈4.2%。

即使有辣招，內地百城樓價上半年累計升幅有7.6%，而內房企業普遍上半年的銷售仍然理想，不過未來需要有更多催化劑，例如併購消息，板塊先有望追落後，走勢未出現明顯改善之前，都係短炒吓波幅為上。

古勝