絲絲講場：利寶閣老闆：富豪飯堂好難撈

回流香港為搵食

陳振傑話回歸前，自己其實已經移民咗去加拿大，後尾聽講有間酒樓唔做，於是佢喺九七、九八年時回流返香港接嚟做，一做就18年，依家仲上埋市添。移咗民都返嚟？佢笑話「咁都要搵食吖嘛！」

做咗18年，有冇諗過做富豪飯堂，搞搞新意思？陳振傑就話，搞富豪飯堂唔係咁易，佢話二、三十年前仲有可能見到四叔（李兆基）落街買嘢食，依家就無可能啦！佢話啲富豪升呢變「超級富豪」，有晒私人廚師、私人飛機，想食咩都得啦，唔多會落街食。

不過計絲絲話，超級富豪都係咁話，返屋企有住家飯食先至係最幸福。

余絲韻