國務院總理李克強出席世界經濟論壇一六年新領軍者年會時再次重申，中國經濟不會「硬着陸」，又指中國經濟發展的基本面沒有改變，宏觀政策亦保持連續性和穩定性，會通過推動結構調整來促進結構轉型保持經濟合理區間運行。有中國呢顆定心丸，外邊風大雨大，都唔使太過慌張！
不過，話分兩頭，今次英國脫歐咁大件事，話一點恐慌都冇就係呃人。依家外界好擔心英國經濟，又話倫敦國際金融中心地位會不保，但聰明的英國人早知脫歐會有短痛，但中長期經濟基礎底子佳，脫歐沒有甚麼大不了。
市場立立亂，大幅上落都由情緒主導。英國公投前，筆者都係選擇唔做唔錯，最多短炒啲同國際因素冇大關係的中資AH股，皆因呢啲大風浪雖然唔係好常見，唔賭好似對唔住自己，但就係因為波幅極端，一旦做錯邊真係會輸得好甘。
繼續集中焦點在中資券商股，昨日提及的廣發証券（01776）逆市升0.6%，收報17.58元。除咗內地券商之外，在港主營券商業務的中資背景本地券商股亦可關注，其中國泰君安（01788），昨日收報2.61元，升3.57%。
筆者睇咗成日，見到不乏大手主動買盤掃入，再睇走勢，五月底以來底部支持上移，若能以大成交突破250日線2.62元，應有力挑戰3元關，主要支持在2.3至2.4元。
司慕渢