絲絲講場：公投前轉按卡梅倫早知脫歐？

嗰日英國首相卡梅倫（David Cameron）為咗英國脫歐公投嘅結果，哽咽住咁宣讀辭職聲明。不過絲絲開始懷疑佢嗰幾吓哽咽到底係真唔係，事關佢啱啱畀人踢爆，喺公投前八日同滙豐簽咗份新嘅住宅樓按喎，有冇咁蹺？唔通早就知自己冇得留低喺唐寧街10號？

脫歐公投手尾長，已經夠佢頭痕，近日仲有英國傳媒踢爆佢同老婆（Samantha Cameron）公投前八日，即係六月十五日，靜靜雞同滙豐簽咗份新嘅住宅按揭合約，輿論就猜疑卡梅倫係咪一早知道公投留歐無望。

事關卡梅倫依家住緊首相官邸，佢辭職後搵到繼任人，就要搬出官邸，搵地方落腳。咁啱傳媒發現佢公投之前，已經為佢間租咗出去嘅Notting Hill豪宅同滙豐簽咗份新嘅按揭合約，合約詳情無從得知，但間豪宅值350萬英鎊，即使英鎊近日貶值，兌番港紙至少值成3,592萬幾蚊。

份樓按遲唔做、早唔做，偏偏公投前八日嚟做，得咁巧合，係人都會估佢一早知道留歐派輸硬，於是急急搞按揭。但唐寧街10號發言人就話，大家不時都會轉按啦，係正常舉動，又話無事先知道公投結果咁話。

就當唔係事先知結果，但係敏感時刻有啲嘢要避忌，是常識吧！一國元首喎。

余絲韻