金融遊學團：魚缸經紀望繼續「吹」
上網撳一下Enter，股票交易就完成！難怪新一代投資者都選擇網上交易，那證券行的經紀角色是否因而日漸式微？事實上，經紀的工作並不能由電腦取代，如日常與客戶交流、分析市場資訊等，就需要經紀親身上陣。今期《金融遊學團》直擊魚缸，讓大學生體驗證券經紀的工作及了解業界前景。
團隊：客路多元 分頭行事
信誠證券聯席董事張智威帶領三位大學生，中大Angus、中大Warren及樹仁Paris參觀位於中環的信誠證券總行。營業部逾千呎的大房坐滿經紀，正前方掛有一部大電視，顯示恒指報價。同學們參觀當日，港股已四連跌，成交額徘徊在500多億元，交投氣氛淡靜，只見經紀閒坐睇股，電話甚少響起。
大時代後 殺傷力巨
該行副總裁何智威形容現時市況慘淡，「我經歷過九八年亞洲金融風暴、○三年沙士疫症、○八年金融海嘯、以及最近港股大時代之後的跌市，今次殺傷力比之前大，以前跌到好低都有人肯買貨，但依家咁低都無人敢買，客戶嘅錢喺大時代嗰陣壓住晒。」他又指，收入較大時代時期大縮水。
經紀們有自己客戶群，會為他們落盤，但網上客戶又由誰人負責？大廳角落有一間小房，是盤房及投資部，盤房同事負責處理公司客戶及網上客戶交易，街外客致電買盤亦是由他們接聽。投資部同事則負責股評、撰寫文章，並上載至互聯網。投資部高級經理劉兆祥每日會寫投資專欄，同時管理盤房運作、審批孖展借貸等。
落盤：交易錄音 出錯自負
何智威認為，客戶有專屬經紀的好處是，對方可提供投資意見，講述最新消息，讓客戶緊貼市況。他又指，「市旺時，有時連電話都聽唔切。至於落錯盤，自己就未試過，但見過類似情況發生，會聽番電話錄音，求證係咪經紀做錯咗，如果真係，唯一解決方法就係要經紀自己承擔責任。」
買入賣出 講清講楚
經紀落盤好像手板眼見功夫，但做落都具挑戰性。張智威安排學生模擬落盤，「先覆述客戶落盤內容，記住講清楚係『買入』定『賣出』，因為『買賣』兩個字太易混淆，之後就要睇清楚價格，確定無打錯資料，就輸入交易密碼，最後落盤完成。」
他續指，「限價盤代表要指定價格先成交、增強限價盤則要指定價格成交或好過該價位嘅成交、競價盤係開市時第一口價就買，競價限價盤係開市前作為對盤之用。」大學生聽到他講解後，恍然大悟，對買股票又有多一重認識。
學生Paris嘗試輸入滙控（00005）一手400股的買盤，見她和兩位男生仔細核對輸入內容，最後當然模擬買盤成功！
「錢」景：內地投資客較豪爽
學生Warren直言，覺得經紀工作最終會由網上交易取締。不過，張智威解釋，「經紀會解答客戶問題，如點解MSCI唔納入A股，但個市仲升？經紀可以畀到相關睇法，網上交易係做唔到。」
他坦言，明白業界正趨老年化，故着力開拓網上市場，同時吸引年輕人入行。
攻網不忘強化服務
面對網上證券公司競爭，他指，公司致力提升網上系統及服務質素，「網上證券商若出現系統問題，唔會有專人幫你手動落盤。我哋唔同，當網上系統出事，都會派專人接聽電話，所以證券業始終唔可以完全靠網上交易。」
他又稱，「內地投資者好豪爽，佢哋唔介意畀貴少少佣金，由專人服務佢哋。」
Angus亦認為，經紀一職不會式微，但在汰弱留強下，證券行最終會餘下5至6間持續壯大，其餘就會因市場競爭激烈而倒閉。
他笑言，「我一直以為證券行好似電視劇嘅情況，好混亂、好嘈，但原來經紀好似投資顧問，會同客戶傾偈。」