孖妹S檔案：財界瘦身 Cut極有譜

財顧界：產品多樣 主動求變

謝：高富金融集團常務董事 謝禮健

Kitty：依家財圈有邊啲公司唔縮皮o架，好似成行都冇啖好食喎。

謝：環球金融機構面對監管機構愈來愈嚴，唔少都會縮皮，撥番資源去應付監管，加上市場波動性俱增，極多不明朗因素，例如要睇各國貨幣政策，投資者對市場戒心大咗，而且處於低息環境，亦令人投資意欲減退，依家大家須面對嘅係，股市波動性大咗，但收益率就反而遞減嘅事實。

謝：我唔會用「差」嚟形容現時嘅理財顧問界，但前景係好具挑戰性，有部分行家，特別係歷史比較悠久，難轉營運模式嘅，又或者係一啲只做香港市場嘅，都被收購合併，賣盤再轉型。

高富謝禮健表示，理財顧問界前景甚具挑戰性。	耀才許繹彬表示，裁員潮未殺到埋身。	星展王良享表示，近來不時舉辦講座吸客。

彩兒：你哋咪燒到埋身？

謝：好彩亞洲區唔少市場都有我哋嘅足迹，而且近年內地人嚟香港買保險已經成為潮流，我哋做埋代理，所以都唔使太擔心我哋嘅！香港當然係我哋嘅基地，但內地、北亞、東南亞發展潛力巨大，機遇處處。

保持質量 續請支援

我哋對策係拓展多元化產品金融平台，一啲保險產品同保守型產品，例如保證紅利分紅嘅產品可能賺到3至4厘，近年好熱賣，所以隨住投資者口味受制於投資環境而改變，理財顧問都要跟住求變。

謝：另一方面，都要針對性開展新業務，更着重資產管理及規劃，家族信託都係一個新方向，所以高端客戶亦係吸新客嘅主要目標群。

Kitty：咁下半年會唔會食西北風？

謝：近兩年係政策市，美國聯儲局停止量寬後，走向正常化需時，但隨住不明朗因素逐漸消除，我對下半年市況樂觀，不過事件可以好突發，唔可以鬆懈。

公司發展上係保守樂觀，請人會傾向保守，但唔會Cut人，為Keep住高質素服務，會主力請支援性部門員工，好似行政及前線支援嘅同事。

魚缸界：積極擴充 備戰通車

許：耀才證券（01428）執行董事兼行政總裁 許繹彬

彩兒：接連有銀行結束證券業務，唔通證券界即將牽起一輪腥風血雨？裁員潮會唔會已經殺到埋身？

許：彩兒，話唔驚就係呃你嘅……舊年港股唔計大時代，每日成交平均有800億至900億元，但睇番依家，連500億都未必夠。

其實，唔止銀行嘅證券業務收縮，有部分細證券行都會Keep住有員工自然流失，例如原本可能有5個人做Dealer（交易員），以前有人走咗會補人，依家就未必會，同埋仲有部門整合嘅情況，好似以前滬港通開通時請多咗人，若有部門等人用，就會調職解決。

許：不過，裁員潮又未殺到嘅，畀着咁嘅情況出現喺早幾年，可能啲細行就會賣咗個證券牌就算，但因應下半年仲有深港通嘅Picture值得憧憬，所以都頂住。依家市靜嘅情況就似一二年，唔知咁邪定咁橋，當年都係踢歐國盃。因應市靜，有唔少客會炒埋美期、美股、期金及期油等，主因有波幅、有肉食。

主攻銀行客 推免佣

Kitty：你哋會唔會請員工食無情雞o架？

許：我哋傾向鍾意逆市擴充，趁平租擴張，現時我哋仍然請人，計劃每個月搞一次招聘會，由於唔知深港通幾時嚟，所以都會訓練定員工，主力請前線員工，一旦開新分行就可以即刻上手，再者深圳喺廣東省，相信當地投資者對港股有需求，預計下半年市況會好過上半年。

彩兒：Dealer房靜過圖書館，你哋諗咗乜計仔救亡？

許：其實今年上半年生意額按年比較實跌，但跌幅一定細過恒指跌幅，依家我哋好主力搶銀行客，會為新客提供7個月免佣優惠；另外，因應孖展客最擔心嘅就係，喺靜市之中被綁死嘅利息成本，所以六月中為吸呢類客，推咗3個月免息優惠。

另外，大市打橫行，一旦個市爆上有機會買唔切貨，所以月供股票或者幫到手，例如憧憬深港通，港交所（00388）續受惠，我哋個計劃係做七成按揭畀客，收番3.5%息。

銀行界：人幣業務靜 候轉機

王：星展銀行財資市場部董事總經理 王良享

彩兒：靜靜雞話我知，銀行界係咪血流成河？

王：彩兒，老實講，銀行界有部分領域係發展得冇預期咁快，特別係人民幣生意喺近9個月出現明顯放緩，人民幣貶值，而且波動性較以往為大，所以好多客都唔慣……你知啦，人仔由以往單邊升，走向兩邊發展，其後仲貶值添，啲客嘅戒心令業務停滯；再者，貶值後，離岸人民幣亦較在岸高息，打擊人仔貸款，所以處於低增長時期。

王：另外，喺大時代之後，股市滑落，暫時冇乜訊號預示會走向牛市，股票融資業務收縮得好緊要，部分主力做投行生意嘅，都要轉做商業銀行嘅財富管理及貸款；債券業務中，近一年點心債近乎係冰封添，所以生意淡薄，銀行轉型亦令部分範疇競爭加劇。

美元去向 預示信心

Kitty：你會唔會仲愁過阿愁？

王：我除咗上述範疇有壓力之外，都唔覺得有其他特別大鑊喎，留意到行情，財管客服經理都仲請緊人，投資顧問仲有挖角情況添。

王：我哋行做多咗網絡廣告，真係無孔不入，頭先我睇睇吓歐股、倫敦期貨資料，同埋自己啲專欄，都見到我哋行啲廣告，另外，都會用專業資訊同建議吸潛在客戶，我自己過去兩星期都講咗5個講座，旨在吸客。

彩兒：英國完咗脫歐公投之後，仲要留意啲乜？

王：其實一有不確定性，市場最愛買金、買日圓，一旦買到盡，就會走去買美元，其實好多商品，例如期油咁，都係以美元報價，原本由於第二季油價回升，因而可以走出通縮嘅漩渦，但若之後再有突發事件令美元強勢，通縮憂慮又升溫嘅話，就會打擊消費者信心同投資者情緒。

王：再者，中國經濟增長同資本帳開放情況都值得關注，若人仔匯價穩定，資本帳開放會快啲，資金來港易啲，相關投資信心亦有望回歸，離岸同在岸人民幣息口拉番近，香港人仔貸款生意先有望好番。

若有料報畀彩兒同Kitty或有嘢問，可電郵money.biz@on.cc

彩兒、Kitty