期指觀瀾：睇多兩日落注未遲

政治與金融世界，往往唔到揭盅一刻，都估唔到下一步發展，坐定粒六，預期英國脫歐公投大步檻過的，上周五代價不菲，在幾乎沒有預算脫歐的可能下，港股一度急挫1,206點，尾市因為外圍匯市及股市低位回升，最後跌幅收窄至609點收20,259點，在好淡互撼之下，大市主板成交幾近逼近千億元水平。

期指上周五即市波幅驚人，低開後因為英國點票，留歐陣營曾經領先，見過20,999點，之後形勢逆轉，市況也急轉直下，午後低位見19,564點，高低波幅達1,435點，日市收市前拗腰，收20,156點，七月合約收20,158點，分別低水103點及101點，六月合約成交罕見地達22.5萬張。

公投前建議看官食胡清倉，筆者無貨一身輕，上周五可以無壓力底下見證大時代，盤中見恒指調整差不多一步到位，尾市在19,960點附近細注補回好倉。