英國脫歐公投演變成環球金融市場「黑天鵝」﹗恒指上周五一度挫逾千點，一旦早段做錯邊，真係閉翳！好在尾市略為回順，恒指最後收報20,259點，全日僅跌609點，主板成交增至998億元，即使低位捉正牛仔成功走轉短，都唔知夠唔夠買驚風散！
港股通餘額48.01億元人民幣，淨流入金額達56.99億元人民幣，創去年四月上旬港股大時代以來最大單日淨流入金額。似乎外圍愈亂，北水就乘機大手吸納港股。睇番港股通個御用經紀號「6999」，首兩隻最高淨流入的股份是建行（00939）及工行（01398），兩股收市分別跌2%及3%。國企股以中國財險（02328）跌幅最大，收報12.86元，跌7%。
金礦股係今次事件的得益者，招金礦業（01818）、靈寶黃金（03330）、中國黃金（02099）及紫金礦業（02899）升幅介乎2至7%。上周提及過的海信科龍（00921）逆市升1%收市。雖然話，英國脫歐後，尚有好多手尾跟，但係對於業務與外貿關係不大的內地企業而言，實際影響唔大，被拖落水反而帶來低吸機會。
既然港股通人氣持續升溫，外圍立立亂，博部分資金轉回新興市場，就睇實券商股。見到廣發証券（01776）上周五隨跌市向下，一度低見16.82元，惟其後跌幅收窄，埋單跌4%，收報17.46元。
新股東方證券（03958）正在招股，博下個月初深港通有好消息，加埋呢隻新股下月上旬掛牌有機會帶動板塊氣氛，短線廣發若再次守得住16.8元支持位，小注吸納，博挑戰20元關，穿16.3元止蝕。
司慕渢