Market Insight：中資券商股靠得住

個市成交唔算旺，但假假哋都連升五日，恒指昨升73點迎接英國公投結果。但其實近兩個月恒指在19,600至21,600點之間的大型上落市，被大戶舞到忽高忽低，根本好淡雙方仲未分出勝負。公投結果後，焦點肯定返回聯儲局幾時想加息的炒作上。

A股落選MSCI指數，在下已即時講過，要老外落疊必先炒起港股（H股），成個HK China的股市夠熱，到時外資掉轉頭求你畀佢放錢入嚟。近日有迹象顯示，真係有北水南來密密吸，自從五月底累積餘額低於千億元後，枕住見資金進場，前日港股通錄得33億元人仔淨流入，更創近十四個月新高。

銀河價位細較好炒

依家收市餘額經已得番751億元人仔，是一四年底滬港通開波以來最低。照咁趨勢，個零月時間可能就會用光，可以預期，港股好可能多個古仔炒，就係擴容同深港通年底通車，近排個市一落到低位即彈，都唔多似空穴來風。

港股通熱捧的名單離唔開幾隻指數權重股，好似平均比A股折讓兩至兩成幾隻內銀、滙豐控股（00005）、騰訊控股（00700）、中移（00941），搭埋內險同「三桶油」，真係正路都唔正路。係咪好似傳聞咁，乃是國家隊所為？無人知，要由呢份北水購物清單尋寶唔易，與其估估吓，不如買番券商股。

假如春江鴨真係押注賭中港股市氣氛改善，斷估券商股都唔會失禮，中國銀河（06881）、海通證券（06837）、中信證券（06030）及HTSC（華泰證券）（06886）之中，純計炒作，在下揀細細粒的銀河同埋較受惠e-brokerage的華泰。

經濟放緩，零售業首當其衝，至於一些生活必須品的影響較小，衞生紙係其中之一，隨即令人諗起恒安國際（01044）同維達（03331）。維達首季收入按年升11.3%，若撇除匯率影響，自然增長為17.8%，另錄得約500萬元的外幣匯兌收益。在紙漿價格維持在低水平，預計集團可保持平穩增長。

理文拓衞生紙業務

維達股價近兩周在14至14.4元橫行，昨日收報14.08元，失守10日線，如果未能在現水平企穩，將有機會下試13.5元水平。

理文造紙（02314）主業仍做包裝紙，不過從舊年業績睇，包裝紙收入按年大致持平，亮點係近年進軍的衞生紙市場，收入有4.2億元，按年大增4.7倍，拉勻之後，總收入增長3%。衞生紙業務若可成為集團盈利的新增長引擎，可望多兩眼。

古勝