孖妹S檔案：美大鱷賭牙骹 同股神鬥炒

豪擲250萬下戰書

T：Hidden Brook Investments董事總經理 Ted Seides

彩兒：見到巴郡股東會年年都人山人海，就知幾多人崇拜巴菲特，渴望喺佢身上攞到啲投資智慧，但你○八年就反而公開同佢打賭，唔通當年你覺得股神唔及你英明？

T：我當年決定同巴菲特打賭，係因為覺得自己贏面好大，就好似玩無限下注嘅德州話事啤抽到兩條「煙」（Aces）。○八年一月，呢個賭局開始時，標普500指數嘅估值喺歷史高位，睇歷史，股票估值過高，之後通常都表現唔好，當時我相信未來大市表現差，對沖基金應可跑贏。

Kitty：雖然你所揀嘅對沖基金上年回報率有1.7%，多過標普500嘅指數基金所賺到嘅1.36%，但係過去八年裏面，你只有兩年跑贏，目前指數基金累積回報達65.67%，你只有21.87%。依家距離呢個賭局完結只係剩低兩年，似乎你好可能最終會成為股神嘅手下敗將喎。

標指強勢 量寬所賜

T：雖然情況未如我所想，但有時就係咁㗎啦，好似即使抽到兩條「煙」，都係會輸。

彩兒：對沖基金一般收取2%管理費，另加20%表現費，好多人都批評芬佬食水太深，令基金回報被大幅蠶食，你又點睇呢個講法？

T：就對沖基金是否可跑贏大市，巴菲特着眼點單純係對沖基金收費，收費係其中一個問題，但唔完全解釋到對沖基金跑輸大市。

Kitty：你覺得有咩原因令你輸畀巴菲特？

T：標普500指數過去幾年跑贏環球多個市場，跟美國近零息嘅環境有關。其實，攞標普500指數同我揀嘅對沖基金回報比較，本身並唔係完全合適嘅，因為後者所投資地區分散，偏重細價股，亦比長倉基金承受較細嘅市場風險。

○七年時，標普500指數估值已好高，理應係不利佢嘅走勢，令我贏面頗高，但標普500指數喺○九至一五年間節節上升。大部分人都認同，聯儲局喺○八年金融海嘯後推行嘅量寬計劃，扭曲股市原有走勢。

另外，對沖基金有時持倉水平會好低，揸住大量現金，○九年起近零息嘅環境令佢哋來自現金嘅利息收入近乎零，亦係影響回報原因之一。

食硬客仔 未憂飯碗

Kitty：會唔會仲有其他抗辯理由？

T：仲有呀，低息環境、市場透明咗，同埋行業競爭加劇，令借貨沽空成本上升。據我哋估計，現時每年借貨沽空成本，比○九年前高出5%，即係一個40%短倉嘅對沖基金，每年會少咗2%回報。

彩兒：你之前講過，喺大牛市入面，用追蹤大市表現嘅投資方法較有利，跌市則有利對沖基金表現。你覺得未來兩年會唔會出現一個大跌市，令你可最終反勝巴菲特咁峰迴路轉呢？

T：一般嚟講，大跌市係好罕見，仍然有可能會出現，但喺未來兩年發生機會不大。

彩兒：唔少人認為，對沖基金業風光日子已成過去，未來會面對大規模贖回潮，投資公司黑石集團總裁詹姆斯早前話，下年對沖基金整體管理資產會比今年大降四分之一。你擔唔擔心自己飯碗不保？

T：對沖基金贖回情況其實唔嚴重，據統計，今年第一季對沖基金行業整體錄150億美元贖回，佔行業管理資產總數唔夠1%。我預期，若對沖基金整體表現短期冇改善，贖回會有所上升，但詹姆斯預測就冇咩可能成真，依家投資者冇咩其他更好選擇。

歷史與周期悟道理

Kitty：你征戰股場咁多年，領悟最深嘅究竟係咩？

T：任何成功嘅長線投資，都會有表現平平嘅時候。我學到最重要嘅嘢，就係明白歷史同周期，好似現時對沖基金所受嘅監管，係我從事金融業以來最嚴格，但學習過投資歷史嘅人都會知，當共識嚴重偏向一方，市場自然有方法扭轉局面。

財富雜誌一九七○年嘅一篇題為「Hard Times Come to Hedge Funds」嘅文章，形容當時對沖基金面對嘅挑戰，正正就係呢個行業現時所面對嘅嘢，若投資者當年完全放棄對沖基金策略，可能會錯失近半個世紀跑贏大市嘅回報，同埋令投資更分散嘅機會。

打賭巨額贖回出現

彩兒：若今年再賭過，你有信心落咩賭注？

T：我會賭對沖基金所受嘅監管會有所增加，尤其來自政治化嘅退休基金。我會賭對沖基金行業會出現一啲引起注視嘅贖回。我會賭對沖基金嘅收費會持續下降。同埋我會賭對沖基金可搵到方法，順利克服今日呢種咁具挑戰性嘅經營環境，做得遠比今日大眾所相信嘅好。

若有料報畀彩兒同Kitty或有嘢問，可電郵money.biz@on.cc

Kitty　彩兒