Market Insight：滙控有條件博反彈

上周五市況多少體會到，熊市博反彈確係唔易，大市開高後追貨買盤寥寥，若非富時指數比重變動關係，最後一刻換貨交易增加，成交好大機會得500億多少少，又返到塘水滾塘魚的悶局。

上周四，一名英國工黨議員遇襲身亡，令近排英國民調中氣勢如虹，與留歐支持拉成均勢的脫歐派，輿論上無疑遭到重挫。雖然民調顯示大家都有四成多支持，但留意英國外圍莊家盤口，事件後賠率變動，脫歐升到3倍樓上，留歐熱到透得番1.3倍，對事態發展影響不言而喻。

公投前，靠嚇言論像雪片飄至，講到英國人選擇脫離歐盟，唔係朋友就即係敵人咁款。無論旅遊、商貿往來都要隔絕，講到似層層。歐洲銀行業管理局（EBA）警告， EBA作為歐盟銀行業監管機構，會由倫敦搬到其他歐洲國家首都。

畀筆和解費做了斷

今時今日，英國金融業在區內首屈一指，成熟法制與監管外，其實同採用英語較易聯繫世界有關。唔通歐洲金融中心第時真係可以遷都德、法、意，咪吹水喇！講真，不如擔心萬一英國退歐，德、法、意幾個老大哥仲想唔想留喺土崩瓦解的歐盟繼續收拾爛攤子好過。

如果看官們真係唔賭有蟲咬，係都要押注賭一賭公投結果，如果押注留歐，諗落滙控（00005）及渣打（02888）一類跨國銀行，最初的股價反應該係最直接。

兩者之中，滙控又有消息配合可以睇睇。若股齡少於十年，未必知道○三年大笨象進軍美國，大手筆用約160億美元收購主攻按揭的美國Household International（HI），及後改名HSBC Finance Corp，以為實現歐美亞三大地區版圖併合，建構跨國大型銀行夢圓。可惜人算不如天算，遇到美國海嘯違約潮，以為賺大錢變揩大鑊，仲為此捲入集體訴訟，一打就超過十年都無定案的長命官司。

周末有消息，滙控準備畀15.75億美元和解費來個了斷。基於訴訟已糾纏多年。今時今日滙控低殘的估值，老早已反映機構投資者預計滙控賠償的風險。

今次和解金額，也比滙控估計的最高潛在罰款36億美元低一截，應可當成好消息去炒。睇番四月低位至今，滙控反彈幅度有限，訴訟拆彈，加上公投一旦大步檻過，博短期返到50元樓上實在唔算過分。

擎天可挑戰前高位

之前都提過軟件股，當中金山軟件（03888）績後股價雖大跌，但仍守住14元支持位，基本因素其實唔錯。另外，擎天軟件（01297）都可留意一吓。擎天舊年純利增長18.6%，收入增兩成半至4.37億元人仔，業務分為四個範疇，其中出口退稅軟件及相關服務去年收入按年增長逾三成。

此外，集團近期有意與阿里巴巴旗下的阿里雲發展低碳雲平台，上月又同中國航天科工集團旗下航天信息（600271.SH）簽訂戰略合作框架協議，未來發展前景不俗。

走勢上，該股若可重上及企穩喺10日線4.5元水平之上，有勢挑戰此前高位。

古勝