絲絲講場：小加金句：港交所係賺錢雷鋒

雷鋒係邊位？嗱不要問，只要信。

完美人格 學習榜樣

雷鋒喺六○年參加中國人民解放軍，佢人格幾乎完美，係人民學習嘅榜樣。

話說，尋日港交所旗下LME（倫敦金屬交易所）亞洲年會開鑼，下午有個「與CEO對話」環節，觀眾即場只要問得出，小加總裁就會答。場上，小加提到港交所喺前海籌建大宗商品現貨交易平台，只係想將內地過剩嘅資金同產能有序咁結合，有效服務實體經濟。

港交所咁偉大？點知，小加即刻話，港交所唔係雷鋒，而係賺錢嘅雷鋒，又話再準確啲講，係賺城市錢嘅雷鋒。

咁即係「忠於革命忠於黨」、一邊時刻服務人民又一邊賺錢？不過咁喎，話說雷鋒年僅22歲就因公殉職喎。

LME年會賽車做主題

講番啲吉利嘢。LME亞洲年會重頭戲LME晚宴尋晚舉行，去年主題係紅磨坊，絲絲仲記得去年啲性感女郎勁歌熱舞，今年正經得多，主題係類似格蘭披治大賽車咁，仲放架跑車喺會場，究竟係配合港交所就快推市調機制（VCM），定係要配合一帶一路呢可？

余絲韻