Market Insight：公用股高息夠吸引

自美國公布五月非農就業數據衰到貼地，六月加唔到息已毫無懸念。十年期美債孳息縮到落1.7厘的頸線，一有冬瓜豆腐，準備向厘半關插落去的姿態。美金轉弱，對於挾淡中的港股都算火上加油，港美息短期難升的預期，今浪即使見芬佬集體被挾或正忙於恐慌性追貨，選擇上相當有趣。

經濟無起色，內地的舊經濟股固然引唔起大戶胃口，反而新經濟代表騰訊（00700）卻是愈貴愈追。

另外，與平常的升市之最唔大分別，是防守性股份，追求股息的欲望旺盛，利率敏感的恒生房地產基金指數，升到上近十個月高位，而恒生公用事業分類指數創下近七個月高。

L形經濟成新常態

從資金取向，可見大孖沙集中揀一些進可攻退可守的公用股及高息股，為睇錯市買定保險，揭示整體市場風險胃納，唔可以話完全釋放，至少同舊年港股大時代，唔理三七廿一乜都掃一餐的時段比較，根本不可同日而語，個個摸住石頭過河。

近排，中國經濟唔係U，更唔係V，係朝L形發展，成為市場話題。無疑，在金融海嘯爆後，全球產能過剩，需求不足已經成為常態，L形發展大有可能成為全球經濟的新常態。

對香港而言，沙士後個人遊炮製了一段人為的繁榮，但內地經濟走下坡，彈丸之地亦開始因為天量遊客湧入，出現各式各樣意想不到的矛盾，賺人仔的經濟模式已呈盛極而衰之勢，加埋樓市嚴重脫離市民購買力，愈來愈多分析認為今次香港經濟比沙士更嚴峻。

咁落去港股會點發展？唔使睇咁遠，亞洲同類例子多的是，七、八十年代台灣輕工業進入火紅代代，當時平均經濟年增長差不多保持8%，台股在一九九○年到達12,495點高峰，四分一世紀後的今日，台灣加權指數得8,715點，比高位低三成。

保住本金 避免風險

更為人熟悉的，是迷失廿載的日本，至今未見黑暗盡頭。經濟與樓市自九十年代初崩瀉，日經平均指數由一九八九年底高峰38,957點，輾轉去到海嘯期間跌剩6,994點，時至今日，即使央行大聲疾呼，出動到負利率天量印鈔，日股不過是16,830點，連高位的一半都無。

從日、台的例子可見，產業結構轉型唔到，伴隨資產泡沫爆破，經濟由高增進入低增長，股市可以衰到無朋友，並維持一段十分長的時間。唔經唔覺，港股與A股創新高之後，貶吓眼已經超過八年，經過這幾年大型上落市的起起落落，L形經濟投資，最啱用都係巴菲特兩大投資心法：一是避免風險保住個本唔好揩；二是緊記第一條。

內地五月CPI按年升2%，其中豬肉價格成為推高通脹的主因，豬價按年上升33.6%，按月亦升2.3%。豬價由去年開始逐步向上，更加不斷創新高。

北京市政府喺上月都要出手抑制豬價，推出政府儲備凍豬肉應市。其實三月及四月生豬存欄均見回升，環比錄得正增長，而繁殖母豬存欄連跌近三年後，於四月止跌回升。喺豬仔及飼料如玉米、大豆等價格上升下，短期對豬價有支持，料下半年仍會維持在高位，惟未來再大幅上升空間或有限。

萬洲有條件炒一轉

在港上市的豬肉股有萬洲（00288）、普甜（01699）、惠生（01340）及雨潤食品（01068）等。萬洲喺過往一後時間就最受惠，舊年賺7.9億美元，按年都有2.6%增長，期內透過旗下的史密斯菲爾德增加由美國進口豬肉，由於價格較低，利潤相對提升。史密斯菲爾德首季淨收入按年升近25%，亦成為萬洲的支持。

此外，其股價亦大致可反映豬價的走勢，舊年十二月中由4元起步，今年四月升到6元水平，而近兩個月趨平穩，在高位整固，近日重上各平均線之上，有望挑戰6.5元，趁豬價仲企穩，短炒一轉亦諗得過。

古勝