絲絲講場：呻CEO難搵 李寧講緣分

要識領導又熟行情

由金珍君辭任代理CEO職位起計，李寧都「代」咗差不多年半有多。李寧對心水CEO有乜要求？佢講明要搵一個識得帶領內地品牌參與競爭嘅，除咗熟悉行業又要對內地企業理解。聽落，呢啲條件好正路，CEO真係咁難請？

唔通係李寧要求特別高？如果要好似當年佢做體操王子咁，唔止吊環、雙槓、鞍馬乜都得，仲要下下獨創啲總難度分極高嘅招牌動作，夠全面又有獨門招嘅人才又真係唔易搵得到，邊得個個做到「李寧交叉」、「李寧大回環」等完美壯舉？今時今日怕且連李寧自己都未必做得番，就連佢想分拆「紅雙喜」上市呢項壯舉都未有新進展啦。

無意回A股 撐香港

不過，運動員捱出身嘅，肯定有樣嘢比一般人強，就係意志。李寧尋日就好堅定咁講，公司無意重回A股上市，仲話雖然全球競爭增多，內地資本市場發展又快，但佢依然力撐香港資本市場係好選擇。

我哋講番搵CEO嗰筆先，既然CEO唔係咁容易變出嚟，咁點？李寧話「要啲緣分」喎！緣分？嘩，哪年哪天可相見？

余絲韻