Market Insight：燃氣股吸引力重現

有外媒報道，一月初人行已暗中放棄讓人民幣中間價市場化進程，回到以往強力控制的台階，本來以為消息石沉大海，點知人行去到上周先透過微博發文澄清，繼續撐話匯率市場化改革方向不變，指控說法是捏造事實。

人民幣市場化改革，照睇一刀切煞停機會真係唔大，始終人民幣啱啱先入咗SDR，匯率改革可以話無得行返轉頭，但去年811小匯改，人民幣閃跌，引發環球貨幣貶值戰以及中國經濟硬着陸的預期，隨後更演化成環球股市連環插水，反映今日全球怕通縮怕得要死。

人幣長遠易跌難升

人民幣加入競貶遊戲，不單歐美等發達國家唔想發生，其他同中國出口經濟性質較似的新興市場，為免貨幣戰連鎖反應，都唔會想見到中國放任人仔貶值的一日出現，更何況中國金融一放就亂的傳統，資本外流肯定更激。811外界反應其差之後，人行轉向歎慢板，匯率浮動急唔嚟的盤算，其實一啲都唔出奇。當然，以現時經濟及出口製造業的慘況，人民幣長遠都係易跌難升也。

上周五介紹，話班大孖沙偷步炒五月銷售數字，炒車股走勢依然唔錯，華晨（01114）、東風（00489）及吉汽（00175）升幅介乎2.2至5.1%，睇個勢應該仲有一、兩日炒吓，但謹記要識得落車。

至於騰訊股價破頂兼創歷史新高，潛台詞係話畀大家聽，芬佬對住經濟每況愈下的中國市場，同大家一樣束手無策，索性揀「新中國」代表，兼且挾班淡友睇有冇人因為補倉加入鬥傻的音樂椅遊戲。

基金同散戶最大分別是收得人管理費，唔可能成個倉沽清揸現金，即使睇後市淡過水，揸住4至5%淨現金往往都已經係極限，家陣買內銀股怕壞帳，買工業股驚出口唔掂，基建、資源股就跟住國策消息嚟炒，一輪輪，好難賭得大錢全身而退。近排無嘢好炒，純綷求個安心可吼水務股，上周中國水務（00855）、北控水務（00371）及粵海投資（00270）都見靜靜起革命，前面兩隻仲創埋近月新高。

北控水務前景不俗

北控水務是內地水務股龍頭，覆蓋全國19個省，兩個自治區及四個直轄市，其中水處理服務是主要收入來源，內地潔淨水源稀缺，治水已成為國家重要戰略發展之一，且與地方政府的合作往往是數以十年的長期規模，業績能見度相對較高。

睇番一一至一五年期間，集團盈利足足翻幾番，由6億元升至24.5億元人民幣，複合盈利增長驚人。展望未來三年，多得更多項目開始提供貢獻及市場利率低企，盈利可望保持兩成五左右增長，一六年14倍PE，在高增長故事支持下，現價有吸引力，近日連破幾條移動平均線，企住4.7元樓上，有機挑戰5.37元。

於四月中，浙江省突然宣布下調工業燃氣價格，希望降低企業成本，令部分燃氣股呈插水式下跌，當時新奧能源（02688）及中國燃氣（00384）單日跌幅均超過一成，華潤燃氣（01193）亦跌7.8%。而北京控股（00392）旗下北京燃氣由於業務主要喺京津地區，氣價下調對其影響不大，股價相對平穩。

雖然其後中燃及潤燃分別表示，浙江省業務的佔比細，對集團影響輕微，但市場預計氣價下降影響分銷商盈利，並擔心其他省份或會跟隨，令燃氣股表現弱勢。

氣價下降帶動需求

現時油價上升，加上早前有內媒報道大型煤企或於六月上調煤價，相比之下，天然氣的競爭力理應上升。上周就有大行發表報告，指今年首四個月天然氣需求按年增長15%，主要由氣價下降所帶動。

另每逢冬季，北方霧霾天氣頻頻出現，相信中央及各省將加快推動「煤改氣」，燃煤鍋爐被取替，空氣質素係咪一定有改善就好難講，惟對天然氣需求增加，對分銷商應有利。

最近燃氣股走勢有好轉迹象，其中，中燃股價今個月初開始一直喺10.4至10.8元整固，上周中重返10日、20日及100日線樓上，若能守住10.7元，有望挑戰11.5至12元水平。

而潤燃日前股價跌至20.6元見反彈，正醞釀突破20日線21.6元阻力，若短期在此水平企穩，有勢重上23元。

古勝