北水頭等倉：中鐵建小注諗得過

反正預計到可能會有大龍鳳，避避風頭亦係人之常情。所以，且別期望短期內成交淡靜的問題可以有多大變化。至於盛傳或於「七一」公布的深港通，都係平常心看待，期望唔高失望自然唔大。

阿里巴巴被美國證交會要求提交資料協助調查，據講包括光棍節銷售數據等。老實講，當日決定在美國上市，都預咗會有今日。當然，馬雲剛剛先同奧巴馬會面，今次調查會唔會只係擺姿態，就要等着瞧。

行業增長能見度高

唔想有貨喺手，又驚六月驚濤駭浪，都係繼續睇啲基建、水務、公用等板塊，唔係冇風險，但勝在經常性收入穩定，盈利前景能見度較高，抵禦市場動盪的能力亦較大，即使遇上非理性拋售潮，估值修復亦較快。

就睇番三隻基建股，中國鐵建（01186）、中交建（01800）及中鐵（00390）股價齊自上月中旬開始調整，本月找到支持位盤整回穩，能否在六月波動市再發力，不妨拭目以待。

其中，筆者較喜歡中鐵建，首季純利同比增幅12%，近年積極調整結構，已分拆鐵建裝備（01786）上市。

據瑞銀早前研究報告指，「十三五」期間內地年均鐵路固定資產投資估計達8,100億元人民幣，可見行業增長前景能見度較高，即使撇除「一帶一路」概念，中鐵建現成經營工程承包業務（包括鐵路、公路及其他）新簽合約額增長穩定（首季增長15%），短期股價已調整，應該有得諗。小注一試，初步目標再試10.5元區域，失守9元止蝕。

司慕渢