Market Insight：石油股料扭轉頹勢

華爾街投資者似乎正把六月加息預期升溫，睇成為經濟向好信號，係咪咁樂觀？點都好，道指隔晚再升145點收17,851點，同歷史高位18,351點距離收窄到500點。反觀前日挾得急的港股，昨日就明顯有啲跟唔上，最後埋單升29點報20,397點，但主板成交縮晒水，得464億元，比前日足足少咗四分之一，反映股市之中，審慎的保守派要比心口掛個勇字的清兵多。

始終經歷舊年大時代後，個市持續一浪低於一浪，樂觀派早就在魚缸沒頂，隨住現貨成交得返四、五百億，即市炒家愈來愈難搵到食，只怕惡性循環下，陰乾市況會持續一段日子。

東風華晨值得短炒

個市無炒作主題，但汽車股走勢算標青，東風（00489）、比亞迪（01211）、吉利汽車（00175）升幅介乎1.2至2.8%，臨近月底，又到汽車分析員「早收幾日風」，偷步炒五月銷售數字的檔期，前日美銀美林報告估東風五月份的乘用車批發數字，按年增幅介乎16.4至19.5%，計落一六年5倍PE都唔到。

睇番東風三月底股價破唔到10元關，輾轉跌到落上星期低位7.58元，兩日內連破10日及20日線，估值平同博美銀無收錯風，似乎有短炒條件。另外，近日見有內地車網話四月底北京車展之後，華晨（01114）新推的X1街外反應唔錯，四月底開始級級落，今浪大落後，近日企住7元邊唔肯再跌，冷敲可以諗吓。

美國上市的阿里巴巴畀空軍圍剿，股價創近兩個月新低。事緣是剛由年報中披露，正給美國證交會查緊光棍節銷售的會計計算手法，是否有違反聯邦證券法。一而再話後悔到美國上市，近排又傳被國際反假貨聯盟杯葛，睇怕掌舵人馬雲今趟真係揼心口揼到爛。

當年科網股災後有句「high tech揩嘢，low tech撈嘢」，昨日聯想集團（00992）出成績表，金句依舊適用。

科技公司贏家通殺

科技股世界裏面，贏家往往通殺，唔係間間好似騰訊（00700）、facebook咁厲害可以跑出，個人電腦市場已是明日黃花，聯想轉攻流動通訊，結果智能手機市場又開始進入飽和期，聯想全年蝕1.28億美元，相比前年賺8.29億美元，有雲泥之別。

當中智能手機銷售按年跌13%至6,600萬部，結果移動業務除稅前虧損達4.69億美元，公司揚言致力清除智能手機庫存，睇到聯想業績同股價，唔知揸重小米等上市套現的私募基金，會唔會覺好似有度火由丹田湧上心口。

加拿大石油重鎮早前發生山火、尼日利亞石油設施遭到破壞、伊拉克原油產量下滑，再加埋上周美國原油庫存跌幅超預期，以及產量見下降，種種原因之下，令油價急升，布蘭特期油一度重上每桶50美元。另外，內地今年以來第三次調整成品油價，分別上調汽油及柴油價格，各項消息均支持油股。

「三桶油」昨日普遍靠穩，中海油（00883）及中石化（00386）分別升2%及1.3%，中石油（00857）則微升0.3%。「三桶油」之中，中海油及中石油主要做石油生產，上游業務同油價關連性較大，因此油價下跌，令兩油企業績受到的負面影響較做下游業務為主的中石化大。

由首季業績亦可見一斑，中石油首季蝕138億元人仔，中海油收入按年跌三成；相反，中石化純利增2.67倍，賺66億元人仔，皆因煉油業務轉虧為盈。

部分大行轉軚睇好

早前大行高盛發表報告，轉軚睇好油價，預期今年下半年油價可企喺每桶50美元，並指原油有轉向供應不足的迹象。

唱好油價嘅仲有花旗，預計油價今年第三季將回升至50美元，一七年底將升至65美元。如果油價走勢好似各大行預期一樣，對石油股而言，會係好消息。目前油價趨穩，但大幅向上的空間有限，後向仍有待觀察。

以近期走勢論，中海油及中石化較好，昨日分別收於各主要平均線樓上，若可企穩，有望挑戰10元及5.6元水平。中石油股價今個月一直喺5.2至5.5元區間上落，目前受制於20日線5.4元，突破兼守穩此關口先有機會再上。

古勝