絲絲講場：80後對退休灰到「死」
國際人力資源公司萬寶華（ManpowerGroup）剛出報告，發現有成12%嘅80後覺得退休難，預咗做工做到死嗰日。
報告調查咗全球25個國家近兩萬位80後，唔同地方唔同程度灰。最多80後咁諗嘅係日本，日本排第一就預咗，估唔到中國都唔輸蝕排第二！
80後諗住自己幾時退休？（注意，唔係想幾時退，而係預算自己幾時有得可以退）60歲退休？No啦。最多人（34%）預算自己做到69歲，灰到見唔到自己有得退休、預咗做到死嗰日嘅，竟然有成12%咁多！
又唔使咁沉重，成世流流長，總要放番個人生「悠長假期」嘅。80後最多因乜唔撈？為人哋唔撈的話，最多人因為生仔同照顧年邁父母；為自己唔撈的話，男女理由完全唔同，最多女人（30%）係為去旅行，最多男人（34%）係因為請唔到假索性唔撈！講到呢樣，絲絲算係男人。
余絲韻