絲絲講場：中移小股東嫌唔夠出「息」

話說尋日中移股東會，呢位林伯捉住機會向管理層表達訴求，佢首先多謝中移上年賺大錢，交咗好多稅畀中央政府，大講「有國家，先至有中國移動」，即時令台上管理層肅然起敬。

「冇股東，冇中移」

不過，林伯下一句先至係精髓：「冇股東就冇中國移動，冇國家就冇中國移動，點解要減股東派息呢？」嘩，呢幾句咁鏗鏘響亮，全場除咗笑，仲可以做啲咩呢？

首席執行官李躍唔敢怠慢，話對派息考慮非常重視，今年已經披露咗派息比率係利潤嘅43%，至於林伯要求嘅60%，唔係做唔到，但集團需要預留資金作為5G同埋其他投資，以保持競爭優勢。

送90日期電話卡

話時話，似乎今年啲小股東都幾辣吓。同往年一樣，中移喺股東會上送畀股東嘅小禮物係每人一張「一卡兩號預付電話卡」，不過今年啲小股東對呢份小禮物都幾有意見吓。

有股東呻，一卡兩號喺內地用時，想查詢餘值，一定要打長途電話返香港問客戶服務員，費時失事。另有小股東就投訴公司小氣，點解上年送嗰張卡，有效日期有180日，今年嗰張少到得番90日！李躍逐個聽完後，都承諾會跟進，咁都算唔話得。

余絲韻