唔知尋日咩日子，周圍都係火頭，小加「登山」都惹出火。
港交所（00388）行政總裁李小加尋日喺網誌講「登山」三部曲，提到股票、大宗商品同貨幣呢三座「大山」。當中股票業務「大山」，佢話港交所已去到接近山頂；商品業務「大山」，就去到山腰；定息及貨幣業務「大山」，就喺山腳熱完身準備上山。
嗱嗱嗱，佢呢番話即時惹來Banker寸嘴，話既然股票業務已接近山頂，何必仲霸住，不如畀機會其他人營運，等其他人來搞「山頂」嘢吧！
家陣港交所獨家營運香港證券市場，之前已有金融界人士倡議本地應有多一個交易所，Banker舉腳贊成，等其他人搞番好個股票市場，以免冇咗「紐倫港」後，連一向引以為傲嘅IPO市場都冇埋！仲話其他市場包括新加坡交易所一直虎視眈眈，都唔知幾恨做新股市場！睇嚟，Banker們今次真係堅‧火喎。小加總裁，係咪要正視吓呢？
余絲韻