絲絲講場:財圈拗人仔火藥味濃

人民幣發展呢個問題,果然惹火。港交所(00388)尋日舉行人民幣論壇,傳出陣陣火藥味。

李建英撐華經濟似巨人

尋日唔少與會者都話,中國喺資本市場發展上,仲係Teenager(直接啲講,即係(口靚)仔),有好多嘢都要更加開放、增加透明度、同國際接軌諸如此類。

點知有人企出嚟話唔係咁睇喎。金管局助理總裁(金融基建)李建英(冇錯,就係就嚟退休嗰位)話中國係全球第二大經濟體,舊年GDP足足有成11萬億美元,中國唔係Teenager反而係Giant(巨人),國際唔應該只係要中國跟佢哋走,反而要配合吓中國嘅發展咁話。

嗱隨即有人寸嘴。Tradeweb董事總經理Andrew Bernard話,自己喺阿仔Teenager時同阿仔講「He's large doesn't mean he's right!(大唔一定係啱嘅)」畀絲絲翻譯就係「你估生得大隻就惡晒!」會場真係火花四起。

余絲韻