絲絲講場：小股東妙法谷大Bonus
踏入五月下旬，藍籌股啲AGM（股東周年大會）已經開得七七八八，六月輪到內銀股接力。
內銀派餅卡現金券
過往內銀股都幾大手筆，小股東出席AGM有餅券、快餐現金券攞，聽聞小股東去股東會攞着數原來有攻略！
絲絲由師奶圈中聽到（講到數口精，梗係信師奶），好多公公、婆婆、師奶等，唔單止早嘜實內銀股AGM日期，有啲人仲突登將所持實物股票分拆開，由唔同屋企人持有，博一家多幾口去股東會，攞多幾張餅卡同現金券。
拆細股份全家出動
以四人家庭為例，假設阿媽持有2,000股內銀，「拆」開及轉名畀屋企人分別持有（每人持有500股），咁一家就有四口可以出席股東會。若每位股東出席AGM都有100元餐飲現金券派，一家四口就有400元現金券！
據絲絲所知，依家啲大內銀股有最多持有實物股票股東，人數由幾萬名到廿幾萬名不等。但香港根本冇咁大個場同一時間可容納咁多人開AGM，通常場地坐到一千人已經好多，不過咁，好多小股東去AGM未必係開會，好多攞完餅咭、現金券就走。
一家幾口咁去股東會有冇成本？有。「拆」股成本唔高，只需畀印花稅，聽聞將一、兩手「拆」股大約只需幾十元左右。橫掂屋企阿老媽子老竇或阿公阿婆揸住啲實物股票都係收息唔會賣，做仔女或孫仔孫女嘅，抽多少少時間出啲啲車費當係家庭樂，陪佢哋去攞着數，冧吓長輩開心囉。
余絲韻