通常盃賽年波衫銷量都會大增，不過今年零售寒潮似乎吹到波衫舖。有業界指，今年波衫銷售屬多年以來最差，比沙士、金融海嘯的低谷更甚，「季尾款」更要提早減價，看來今年歐國盃的銷售熱潮風光不再。
擁有四間分店的飛龍球衣專門店創辦逾廿年，其店舖經理歐陽俊文指，過往歐國盃期間波衫比平日銷售會多四成，今年相對看淡，預計可能只有兩成升幅。
本地消費趨弱，個人遊生力軍亦銳減，若不計歐國盃，飛龍平日的波衫銷售額實際上已比去年跌兩至三成，「差過沙士同金融海嘯，咁多年最差係今年……面對的競爭大咗，捨得消費嘅人又少咗。」
今年球會的「季尾款」減價潮更提早至四月尾開始，飛龍亦不例外。
他說「今年銷售差，要減低少少先有反應，七折先吸引到啲人。」要靠球鞋、手套、護膝等足球配件的銷售才能拉勻銷售額至去年水平。
旺角一向是波衫樓上舖的集中地，零售淡風加網購夾擊，有樓上舖形容似打游擊戰。352大本營負責人劉重學指，今年首五個月波衫銷售比去年同期大跌約一半。他大呻352大本營開業十六年，目前競爭模式轉變，網購影響甚大，「以前嘅敵人係軍隊，依家係游擊隊」。
因此今年對歐國盃持觀望態度，待開波後才打算入貨，貨量亦會減少，公司則轉型做自己品牌和訂做制服，希望可以「吊住命先」。