Market Insight：保留實力 少做少錯

自內地權威人士警告，中國經濟會係L形，唔係U形同V形之後，加埋四月新增貸款縮到離晒譜，就連最堅實的股市好友，都漸漸失去了耐性。近排個市唔單止成交愈玩愈奀，沽空佔大市成交比例持續高企，上星期創過十八年新高後，連埋昨日經已連續十二日高見14%樓上，買搵唔到食，惟有反手賭佢跌。

即使人人都知，股市永遠是少數贏多數的英雄地，全民皆淡，也往往是市況即將見底的徵兆。不過，古勝搵番呢兩個數據的時間差紀錄，發現差距可以長到一至兩季，衰到貼地反彈之日離我哋幾遠，講唔埋要去到夏去秋來之時。常言道，黎明前夕分外黑暗，除咗少做少錯保留實力之外，家陣可以做的確實有限。

游資充裕冷待股市

恒指昨日再跌132點收報19,694點，收市計創超過兩個半月新低。話又說回頭，即使個市一池死水，環球金融市場游資其實一啲都唔缺，只係個個聞股色變。早兩日，私有化無再上市的美國戴爾電腦（DELL），因為收購數據儲存技術公司EMC，發債籌旗（橫跨3至30年期），集資額最高190億美元，講緊1,482億港銀。

在下有朋友經私人銀行入飛數球美金，最後超購超成點，手上無數字，但結果係斗零都分唔到，可見稍為有yield，泊到錢落去，都可以惹來閒錢過多的大孖沙蜂冚般統統搶乾。

距離蘋果公司新一代iPhone曝光，至少仲有成個月，近排科技股分析員已經研究點炒iPhone 7概念，一陣又話學華為P9玩雙鏡，要炒舜宇光學（02382），轉頭又話取消傳統耳筒插加多個音箱模組，要掃瑞聲科技（02018），結果兩隻零部件生產商，喺近排跌市之中都算得上奇葩，愈升愈有。反而早前出完盈警，古勝話每股現金揸住兩個幾的富智康（02038），遲遲唔行，到昨日先有番多少鑊氣，升3.1%收報2.61元，是盈警後最高的收市價。

富智康開始受注意

不過，富智康今浪絕非炒蘋果概念，啱啱公司以27.3億元向微軟購入諾基亞若干手機智能資產，交易涉及流動通訊範疇的知識產權、TNS技術、製造、供應鏈及研究與開發活動，到底乜東東，在下烏卜卜。野材報告話作價中3.3億美元（25.7億港元）是購入越南廠房，相當於用富智康一成七手頭現金，增加盈利大約9%咁話。

智能手機高增長期過去，上半年盈警，同Sony及Motorola訂單減少有關，陰謀論認為今次同微軟加強合作，有助將來取得更多諾基亞手機的訂單，但諾記市佔率得4%樓下，只怕消息心理影響大於實際。不過，總算令炒家注意到富智康呢隻現金牛，個勢對辦，可以快炒一轉。

雖然近月房地產市場回暖，中央又大力推動基建，不過一啲產能過剩行業仍然要加把勁去產能，始終問題存在已久，需要一段時間紓緩。

早前國務院已針對鋼鐵同煤炭行業印發相關文件，今次就發布《關於促進建材工業穩成長調結構增效益的指導意見》，提到二○年底前，嚴禁備案和新建擴大產能的水泥熟料、平板玻璃建設項目，支持兩個行業通過聯合重組等方式壓減過剩產能。

信義玻璃硬淨有理

產能嚴重過剩，對水泥價格構成壓力，兼且打擊相關股份的業績。踏入第二季水泥需求上升，產量亦因此增加，據統計局數據顯示，上月全國水泥產量同比及環比分別上升4%及7%。

水泥價格由二月開始回升，有助提升相關企業盈利，但隨着產能增加，升幅放緩，價格更有回落迹象。縱有利好政策出台，但未能帶動水泥股股價，中材（01893）、金隅（02009）及華潤水泥（01313）昨日跌幅介乎1.2至3%，只有安徽海螺（00914）表現較硬淨，微跌0.3%。

另外，信義玻璃（00868）的業績及走勢都唔錯，集團業務包括浮法玻璃、汽車玻璃及建築玻璃三個部分，舊年純利按年增加逾五成，其業務較多元化，定位為全球市場，都成為跑贏同業的原因之一。

走勢上，其股價由一月份低位3.65元反覆向上，已反彈超過四成，上月高見5.48元，接近去年高位5.6元，若市況及成交配合，股價有望更上一層樓。

古勝