絲絲講場：fb一姐靠「3P」 走出喪夫傷痛
仲記得嘛？上年五月「硅谷神鵰俠侶」桑德伯格同丈夫戈德堡（David Goldberg）去墨西哥度假時，男方喺健身室心臟病發猝死，享年只係47歲。
事隔一年，呢位facebook女營運總監（COO）桑德伯格終於走出傷痛，上周首次公開講呢件傷心事，仲話全靠了解3P先企番起身。
藉心理學應付逆境
3P？就咁嘅，有個心理學嘅學說，話人應付逆境嘅能力，好睇呢3個P字頭：Personalization，即係唔好將不幸歸咎自己；Pervasiveness，認清傷痛對自己生命影響究竟係全面定局部；Permanence，認清負面情緒會維持幾耐。
丈夫猝死曾怪自己
桑德伯格話，呢一年來，佢曾經為老公嘅猝死而怪責自己。但認識3P之後就了解到，老公嘅病就算連醫生都未必睇得出；出事後十日佢返公司，開會時會短暫忘記哀傷，於是明白到自己嘅事業生活仍可以好有意義；仲有，應該接受自己會哀傷同感到絕望，但要認清呢啲感覺終會有減退嘅一日。希望呢位女強人呢番說話，都成為你嘅鼓勵。
余絲韻