剛公布認購詳情的iBond（通脹掛鈎債券）已經第六年登場，但香港近年通脹率持續向下，iBond息率跟通脹掛鈎，自然一年低過一年，由最初4至5厘跌到2厘幾，唔少錯過早幾年iBond認購機會嘅市民都大揼心口。但原來金管局助理總裁（金融基建）李建英仲走寶，足足錯過咗6次抽iBond機會！
點解？皆因金管局規定，職員係唔可以與民同樂抽iBond。
之不過咁，李建英話等到自己出年退休，終於可以落場抽埋一份，賺番餐茶。
計埋出年，李建英可以話等足七年，但iBond回報到時可能就……事關香港經濟唔好，大家都估出年通脹會再低啲啲，大概係2%左右，得番2厘息，真係賺嚟飲茶都可能要慳住使。
尋日在場有記者仲講笑咁話，香港依家通脹愈嚟愈低，分分鐘政府出年唔會再推出iBond，到時佢想抽都無得抽……李建英當場爆笑話「唔通行遲半步就走寶？」
不過，就算出年真係無iBond抽，李建英都唔使太失望嘅，因為出年退休嘅佢，仲可以考慮政府為長者而增設嘅銀色債券（Silver Bond）吖嘛。
雖然Silver Bond認購詳情同息率係點仲未公布，但無咗個橙，點都袋番個桔先吖。
余絲韻