創意新勢力：Banker搞App唔靠融資

Edmund選擇不融資，「若有個好正嘅項目想做，又要好多錢，就需要融資；但我公司目前想做嘅嘢自己計得掂數，所以唔想融資完，將啲錢擺喺銀行，再諗做咩。而且攞人錢，就要貢獻股份！我呢啲起步無耐嘅公司，當個Project值一百蚊，要人借一百蚊畀你，佢可能要你好多股份；只有當你個Project值一萬，要人借一百，咁付出嘅代價就相對合理。」

擁話事權 享受創業

他見不少公司獲融資後，創辦人股權所剩無幾，「唔係大股東，就無得再話事。依家我想做咩就做咩，三、五年後，希望話事權仍喺自己手。」他享受建立團隊，以及和同事合作，而非把創業看成一個投資工具。

不靠融資，Edmund想Apptech能進身《財富500》的願望會否幻滅？未必。事實上，公司一直有跟企業開設合資公司，公司業務亦有多方面。惟他坦言，替企業如世紀21及花旗銀行等編寫App，自主性較低，一般只按客戶要求做。

Edmund在銀行界打滾逾十年，曾在不同部門工作，熟悉財務及人力資源預算等範疇。他分享管理分行時的工作，「我要計晒各分行嚟緊五年嘅收支預算，上至分行經理，下至出納員，都要清楚列明每人嘅人工同需要跑嘅數。」經驗有助Edmund管理Apptech帳目。

其後，他發現創業比打工更具挑戰性，單單找合作夥伴及請人已是一大學問。惟他曾有不愉快經歷，「呢盤生意，一開始係同兩個舊同學一齊夾份搞。不過，大家無相處十幾年，做嘢方式同工作態度都有好大差別。」他最後買回兩位同學股份，自己另找拍檔。

聘請員工一大學問

他決定聘外人，但發現揀人並非易事，「以前有人事部篩選，依家要自己學觀察應徵者質素。」他指，請錯人後果嚴重。「交畀個客嘅貨交唔到；炒佢又要搞手續兼嘥錢，佢亦會影響其他員工工作同公司文化。」

在公司編寫的程式中，最高下載量的是Camera3D，但Edmund稱，該App所帶來的廣告收益並非公司主要收入來源，「呢個App影嘅相有好多效果，若影個人就咁行前一步然後跳起，出嚟效果似個人飛起！好玩，可惜唔賺錢。」儘管該App其後加插類似facebook及Instagram等社交功能，但他坦言，因有資金限制，且未能追上對手研發速度，故已停止改良該App，只保留一般功能。

「要創業，就要唔怕輸！」他坦言，創業前須思考很多假設性問題，若生意失敗，把老婆本花光或要打工還債等，能否承受壓力？他發現，現今創業者思維模式跟以往的有很大差別，「以前嘅人搞生意係為咗維生；依家嘅創業家好多為興趣。」惟他叮囑，要滿足現實生活需要，才能尋求更高層次的滿足。