Market Insight：申洲穩中取勝之選

油價繼續令人跌眼鏡，有許多反地心吸力事件發生，例如加拿大山火及一些國家因不同原因而產量下跌，令倫敦期油直撲50美元關口，「三桶油」昨日表現居前，但近期仍算是落後。又話L形經濟，又話阿爺收水，但中港股市衰唔晒，古勝在過去兩星期均話過20,000點樓下入第一注，純粹小注怡情玩吓優質股。

巴郡買入蘋果公司股份，雖然並非出自巴菲特之手，但顯然有「名牌效應」，除咗帶動蘋果公司股價回升之外，香港一眾蘋果概念股如高偉電子（01415）及瑞聲科技（02018）均受益，連首季見紅之富智康（02038）亦幸免於跌。

不過，巴郡買科技股除咗罕有之外，往績卻不敢恭維，首隻沾手之IBM股價大跌近三成，帳面值唔見40億美元，就算呢次買蘋果公司股票亦坐緊艇。

識騰訊唔使識科技

美國咁多科技股選擇，例如Alphabet、facebook、Amazon唔去買，巴郡偏偏走去買IBM，可見每個投資者都有其專長，有人鍾意藍籌股，有人鍾意買細價股，買自己不擅長領域只有攞苦嚟辛。

香港股民唔識科技股唔緊要，一隻騰訊（00700）已長升長有，今日季績放榜，市場預期多賺三成。仲有隻金山軟件（03888）明日放榜，過去三個季度業績前後股價都有良好反應。

事實上，買自己熟悉行業的公司起碼唔使盲摸摸，例如鍾意「濕平」，對零售市道如何可能較分析員更加瞭如指掌。

喜歡睇戲的，則對電影市道最清楚；阿里影業（01060）近期有動作，旗下線上電影售票平台獲得17億元人仔A輪融資，並易名為「淘票票」，以此計算其估值將達137億元人仔，但阿里影業市值則達451億元，「夢工場」是織夢的地方，估值不能過於現實。

網上賣戲票照計不涉及重大投資，何故要有ABC輪融資咁誇張？其實，網上巨頭燒錢上來絕不手軟，例如過去的「打的」大戰，燒錢便以10億元為單位計算。

所以，「BAT」（百度、阿里和騰訊）憑資源將佔盡優勢，淘汰對手的最佳方法是票價補貼，結果網上買戲票的價錢可能只需10蚊人仔，去年線上買票便佔七成之多。近年中國電影票房之奇迹，其實由一些上市公司夾錢去創造。

體育品牌逆市向上

科技無疑逐漸取代人手，未來可能再冇戲院售票之職位，大家買票都用手機搞掂，許多行業將受淘汰。工作減少之後，閒暇時間多咗，如果將來無人車興起，出門更加方便，未來世界聽落幾happy。雖然想像歸想像，但旅遊、娛樂和休閒業肯定將大有錢途。

近年零售業最蓬勃消費之一便是體育用品，睇Nike、adidas、New Balance及Under Armour等公司的業績可知一二。在奢侈品相繼撤出香港旺區店舖之時，adidas卻承租猛開旗艦店；內地的體育用品股亦經過兩、三年風光日子，但近季的訂貨會銷售增長開始放緩，長遠未必是國際品牌的對手。

香港股民當然可直接買Nike和adidas等公司股票，但亦可考慮上游製造商之申洲國際（02313）。公司過去幾年都跑贏大市，與體育用品訂單強勁增長有很大關係，在40元附近高位亦有大半年時間。不過，前周五開始曾連續出現6支陰燭，近兩日又見有不俗反彈力度。事實上，該股在40元以上估值雖屬偏高，但從過去一年股價走勢來看，炒上落不難搵餐晏。

成本紓緩有助盈利

申洲另一大客是Uniqlo，但受近年日圓波動影響銷售，幸體育用品銷售佔申洲之比重逐年增加，去年已升至64%，毛利率亦高於其他產品，收入則上升17.5%。

據講今年中國將為最低工資上升設限，用意是為企業減輕負擔，對紡織製衣此勞動力密集行業而言是好消息，申洲近年亦在越南設廠紓緩中國勞工成本上漲的問題，越南新成衣工廠預期今年將帶來貢獻，加上原材料成本下降，今年的盈利增長可望達至兩成，仍屬穩中取長之選。

古勝