絲絲講場：財星「金句」搞嘢過天王

騰祺基金管理投資管理董事沈慶洪：Less is more

要預測股市與股票走勢，運作有時好複雜，但簡化落嚟會發現股價離唔開基本因素。例如舊年四月港股大時代，A股狂升，與經濟背馳，當時我已預計佢會跌落嚟。

「空」與「因果」

佛家講「空」係教人唔好執着，用喺我工作上就係贏錢與輸錢都唔好執着。另外，佛學講因果關係，好多時估錯股票走勢係「果」，無做功課去研究係「因」。

君陽證券行政總裁鄧聲興：控制風險要止蝕

散戶輸緊錢通常唔識走，往往就係咁，輸一次就蝕番晒之前贏咗嘅錢。投資者見到股票蝕15%就要走貨，咁整體成績唔會太差；喺其他股贏番10至20%唔太難，但蝕緊嘅股票就難追番。

金利豐金融集團研究部經理黃智慧：忘記背後，努力面前

以前中學班主任成日講呢句，好影響我嘅人生同諗法。好似投資咁，買錯咗股，止咗蝕就唔好再諗住，再沉迷都冇意思，不如發掘另外啲優質股仲好啦。

ADS Securities零售市場銷售總監陳健豪：要學贏先學輸

呢句係匯市前輩教，我哋做匯市投資，匯率波動可以好大，唔理基本分析、技術分析，以買大細心態去炒都可賺，投機成分較重。若一開始就想贏而唔理風險，可以損失慘重。

所以前提係做好風險管理，嚴守止蝕與止賺位。每蝕50點子就離場、每賺100點子就先套利；賭大細咁50%估中，長遠有賺。若喺風險管理上，加埋基本同技術分析，贏面更大。

百利好金業（香港）研究部董事黃耀明：無長勝將軍，只有不倒翁

初入行，上司講呢句，成為我嘅格言，教識我每次入市都要有Plan B，保持風險意識，千祈唔好諗一注獨贏，即使輸咗都要識企番起身。

余絲韻