絲絲講場：歐達禮掌國際證監組織
證監會行政總裁歐達禮做咗國際證監會組織（IOSCO）主席，帶挈香港威威！
歐達禮二○一二年重返證監會後，仕途一帆風順，喺國際層面更加係步步高陞，喺IOSCO銜頭愈坐愈高。日前IOSCO喺秘魯首都開年會後更宣布委任歐達禮做IOSCO主席。
港代表首次做主席
今次係第一次有香港代表做到IOSCO主席，真係唔簡單！絲絲聽聞，政府好重視香港喺IOSCO嘅地位，今次應該可以飲得杯落。
歐達禮今次坐正，唔係一朝一夕嘅事。佢過去幾年好積極投入參與IOSCO事務，曾經出任IOSCO屬下亞太區委員會（APRC）主席長達三年，代表亞洲市場爭取更多話語權；佢亦曾係IOSCO跨境監管工作小組主席，現時係IOSCO市場行為工作小組主席。佢舊年十二月獲選為IOSCO理事會副主席，唔夠半年，依家再升呢坐正添。恭喜晒恭喜晒。
余絲韻