中電（00002）大股東嘉道理家族除咗主席米高嘉道理同埋佢姐夫麥高理直接參與董事會外，其他家族成員一向都非常低調，好少露面。
不過，尋日中電股東周年大會之後，有記者問米高嘉道理對香港未來發展嘅睇法時，佢忽然有啲感慨，話佢係家族第三代喺香港出世，自己個仔即是第四代都有出席股東會。不過佢就冇講究竟係邊位公子現身，睇嚟絲絲下次都要勇闖佢地股東會認人。
講番對香港發展嘅睇法，米高嘉道理就話，「香港需要更多潔淨能源，香港需要穩定，香港一直以來都係我嘅家」。原來今年中電大打環保牌，米高嘉道理除咗喺記者會開場白講集團未來環保大計之外，今年集團送畀小股東嘅禮品原來係一個保溫燜燒杯，呢個杯出名嘅地方係用最少能源去煮食，真係切合佢哋環保主題。
至於佢老人家會唔會再增持集團股票，米高嘉道理就有啲故作神秘，話自己鍾意買股票，不過已經好耐冇入市，而家族喺中電嘅持股相當穩定喎。
余絲韻