絲絲講場：華僑吳幗欣瘦身「貸」出色

自從舊年稅貸記者會之後，華僑永亨信用財務總經理吳幗欣（Hilda）都好幾個月冇現身，不過尋日一蒲頭，即刻畀記者讚瘦咗又精神咗，唔知係咪推完稅貸之後得閒叉叉電？Hilda笑笑口話繼續瞓身工作，呢排就忙緊推針對公務員嘅新循環分期貸款產品。

不過講起借錢，唔講唔知原來有好多學問。坊間唔少人為抑制購物欲而堅持唔申請信用卡，而且一直冇借過錢，以為「身家清白」日後容易借貸周轉。原來唔係，Hilda話呢批「白板」人士要獲得銀行批貸款係有難度，因為冇借貸記錄，甚至連Credit都冇，銀行批貸款就冇得參考。

咁填申請表果陣，咩都剔下，ABCDE產品都揀，而且申請嘅貸款額有高有低，咁總有一樣中喇啩？Hilda話都唔係，其實銀行都要了解下阿客究竟借錢嚟做咩，同埋最緊要評核阿客嘅還款能力，唔係話咩都申請一餐就總會有樣中!

不過，依家市道麻麻，加上投資環境欠佳，Hilda話貸款需求明顯轉弱咗。該行今年首四個月無抵押貸款嘅已提取貸款額，按年僅錄高單位數增幅，較過去兩年雙位數增幅放緩，Hilda仲預期今年整個無抵押貸款行業增長或有機會倒退添！

余絲韻