絲絲講場：Tesla星媽出車冇得爬頭

不過，講到Tesla早前發布針對大眾市場嘅Model 3，佢媽咪就「好識做」，話明唔會用特權要個仔早啲交車畀佢喎。

取消5%重複落訂

Model 3預訂反應踴躍，訂單至今已接近40萬部。邁厄就話，自己遲咗幾日先至上網登記預訂，喺輪候名單上應該排到好後，但堅稱唔會靠人事關係令自己可以「插隊」，話既然其他人已經排好隊，當然有資格率先享用新車啦，仲話個仔「既要搞新車，又要搞火箭」，唔想打擾佢咁話。

除馬斯克外，現年68歲嘅邁厄仲有兩個仔女。邁厄早於15歲已進入模特兒行業，31歲時與丈夫離婚並繼續撫養子女，兼做模特兒。邁厄大讚佢嘅仔女個個都好了不起，仲諗番起以前要工作，但又冇保母嘅日子，啲仔女就會坐喺第一排睇書，自己就喺台上行Catwalk。

講開Tesla Model 3，發布之後嘅第一個禮拜有成32.5萬個預訂，聽講有人更一次訂咗20架添！不過，馬斯克講到明，每人最多只可付運2架Model 3，重複落單嘅會被取消，而呢啲重複嘅訂單大概只係佔總訂單嘅5%左右，所以唔似會畀人用嚟投機炒賣。

谷數疑為吸融資

雖然係咁，市場仍然懷疑今次Model 3預訂數字可能有很多水分。雖然依家每張訂單只可訂2架，但大家唔好忽略，每人都可以入無限量嘅訂單，只係就每張訂單畀番相應嘅訂金，即每架車1,000美元就得。

因此，有人質疑，外界根本冇辦法證實訂單可代表Model 3嘅真正潛在買家數目，Tesla亦有機會借訂單嘅好表現而吸引更多融資，所以訂單數字多少，真係信不信由你！

余絲韻