Market Insight：舜宇有機會創新高

睇相佬就話呃你十年八年，日央行會唔會畀高盛開口中，為遏止日圓升勢，本周有更破格的寬鬆措施，今日就有答案。自從金融海嘯後，金融亂象頻生，「估佢唔到」漸成常態。

經濟迷失廿載，以往死都唔肯行負利率的日本，見歐洲央行帶頭，結果在一月底照辦煮碗，結果除了刺激咗日本的夾萬銷情，家家戶戶唔信銀行情願提款放床下底，隻yen唔單止無跌，美元兌日圓更由121隊到108都穿埋，兩個幾月時間yen勁升超過一成，出口企業嗌救命，實情央行即使唔想變陣都唔得。

瞄準兩類板塊做淡

打句問句，美國四月加息機會接近零，反而怕會後聲明「鴿」味唔夠，小心破唔到18,351點歷史高位的道指插番轉頭，比淡友一個反攻藉口。

近日中國宏觀經濟數據有明顯好轉，但A股大媽唔放在心上，情願走晒去炒產能過剩未解決、爆煲只差遲早的黑色系期貨，都唔肯去掂股票，搞到A股在3,000點樓下死吓死吓，就已經夠弔詭。

觀乎國指近期表現較恒指遜色，滬港通的雷聲大雨點小，年底前九成九通車的深港通，甚至傳聞中的滬倫通，投資者是不屑一顧。

事實上，人行一四年下旬開始狂放水，A股升完兼爆埋煲，跟手樓市炒到出煙，一線城市急急推辣招防洪，跟手連爛銅爛鐵都炒一餐，想好似美國海嘯後推量寬救經濟，總係擺脫唔到一陣老翻味道。

在首季勒令銀行加強放貸，新增貸款創下史上新高，債轉股最終可能令銀行硬食一批低質資產甚至殭屍企業股權，依家個市揀股票押中寶唔易，但要揀嚟沽，似乎首選係內銀同近期升得好牽強的資源股。

蘋果公司份第二季成績表，十三年來首次收入倒退，作為果粉其實老早估到。前年大屏幕iPhone 6銷情熱爆，舊年小修小改，推過渡產品6 Plus，一來一回注定有強大落差，掌門人庫克都承認，大中華市場中，從來都緊貼時代「尖啄」，換機密過換季的香港，銷情跌得最甘。

不過，會唔會真係衰到畀樂視老總批死，話蘋果公司產品已經「過時」，要睇今年六、七月發布的新一代手機，可唔可以挽回頹勢。

產品躋身頂尖水平

手機代工及零部件供應商之中，昨日瑞聲（02018）及高偉電子（01415）跌得比較多，母公司鴻海啱啱鯨吞聲寶，準備進軍Panel生意，富智康（02038）見一個月低後，拗腰倒升，反而是專攻光學零部件，即係手機鏡頭的舜宇光學（02382）升勢仲未肯停，昨再升4.2%。

話說近排內地手機一哥華為，搵德國相機及光學巨擘Leica合作，推出旗艦手機P9，破格的雙鏡頭設計，旁邊有大大隻Logo，乃Leica首次為中國手機品牌加持。古勝八到，鏡頭模組實際出於舜宇的手筆。雖然Leica粉絲難免失望，但證明舜宇在設計及產品已具備行內頂尖水平。呢類故事芬佬最受落，傳聞今年有更多品牌都會用多鏡頭設計，未來一季睇怕舜宇有條件再創新高。

內地電力股陸續公布首季營運數據同業績，華電國際（01071）首季發電量同比升2.7%，但平均上網電價跌12%，首季純利亦跌11%，主要由於國家下調上網電價。另外，在下早前亦提過，華能（00902）首季發電量同比跌6.76%，平均上網電價跌一成，而昨日集團公布了首季業績，純利跌21%至39億元人仔。

電企盈利前景堪憂

今年一月一日起，燃煤發電上網電價全國平均每千瓦時下調約3分人仔，電企首季盈利已反映其影響，預計電價續有下調風險，投行美銀美林的研究報告就預計，一六至二○年累計的減幅為10至11%。

經濟放緩及電力需求下降，煤電供應過剩的問題持續，電企利用率下跌，有關當局正控制煤電產能增長，發改委及國家能源局日前就發布了《關於促進中國煤電有序發展的通知》，指要嚴控煤電新增規模。

電企去年純利見增長，其中一個原因是低煤價令營運成本下降，惟近月煤價回穩，燃煤成本回升，對於業務以火電為主的電企影響較大，其中華能大部分裝機容量為火電，加上內地積極推動使用清潔能源，電企盈利前景存在隱憂。

古勝