絲絲講場：Tesla預告下款車仲平！

Model 3訂單逾40萬輛

早前電動車龍頭Tesla（特斯拉）推出咗最新型號Model 3，其三萬五千美元嘅超低價引發全球車迷爭相預購，首周就接獲32.5萬輛訂單，至今全球訂單更已逾40萬輛，風頭一時無兩。

不過，其實車價低處未算低，Tesla CEO馬斯克喺剛剛一次外媒嘅訪談中，透露公司下一款產品，亦即係大家猜測嘅「Model 4」（可能不會叫這個名字），售價將再創新低，平過Model 3！有平車買當然興奮，不過，諗番轉頭，既然電動車個價位可以去到咁平，點解Model 3之前嘅型號又賣到咁貴呢？

早期賣貴車有苦衷

馬斯克就話，其實公司之前將Model S同Model X等型號賣到咁貴，車價由7.12萬和8.12萬美元起，係為咗籌集資金進軍低價電動車市場，希望最終人人都有一車在手，帶領全民進入電動車時代。

嘩，原來賣貴車背後，有個咁偉大嘅志向，唔知買咗貴價Tesla嘅車主，會唔會因為有份推動「全民電動車」，而感到自豪呢？

余絲韻