近150年來高高在上嘅投資銀行高盛，依家8蚊港紙都唔使，就可以做高盛客！
真o架。高盛上周推出網上存款平台GSBank.com，只需要低至1美元（即是8蚊港元唔使），就可以開番個存款戶口，話畀人聽自己幫襯開高盛！
其實，呢個平台係高盛完成收購通用金融（GE Capital）旗下業務嘅結果，透過呢單刁，高盛吸咗約14.5萬個零售存款客戶，但仍嫌「唔夠喉」，仲提供年息1.05厘（高過花旗、摩通同美銀）搶客。
睇番高盛首季業績認真麻麻，惟有連零售存款生意都要搶，擴闊吓水源。改行平民路線救唔救到命？唔知呢。
余絲韻