絲絲講場：大款2億投保 碌卡72小時

每次三萬九 碌逾五千次

先嚟一條數學題：內地客嚟香港投保，保費2億港元，碌卡畀，每次5,000美元（約3.9萬港元）額度逐次碌，咁碌法，要碌幾耐？

答案係：3日，碌足3日無間斷。做法當然係位內地大戶擺低張卡畀信任保險Agent處理，總之就係「你夠膽買，我哋全力為你係咁碌」，香港保險界幾時都咁專業、咁拚搏。

有幾拚搏？有數得計。3日碌2億元，每次限碌3.9萬元，即係要碌5,129次。放心，碌卡冇辦公時間限制，Agent連續72小時不停手咁碌，每個鐘碌72次就搞得掂。

絲絲請教過專家，新碌卡機計，最快25秒先完成一次交易，加埋信用卡中心不時打嚟確認（一張卡不停碌，好難唔收到卡中心電話吧），所以絲絲好有理由相信，今次唔止出動一部碌卡機，Agent大有可能兩手「雙龍出海」咁碌，中途怕且有安排人換班去洗手間同食飯啩。

碌完之後張信用卡單，絲絲相信Agent一定好守法咁唔會代客簽，於是呢5,129張信用卡單，內地豪客要遂張簽。好嘞，碌完簽完，唔知佢哋仲有無力握手呢？

余絲韻