Apple Inc.突然宣布要押後一日公布第二財季業績，換言之要等到本港時間下周三清晨，莫非業績唔多掂？唔係，係因為有人死咗。
實情係，因為原定公布業績日，撞正Apple老臣子兼前董事坎貝爾（Bill Campbell）嘅追悼會，所以公司順延一日，畀員工到場道別坎貝爾。佢係已故教主喬布斯Friend底，指點過現任行政總裁庫克，佢周一不敵癌魔逝世，享年75歲。
坎貝爾八十年代係負責Apple銷售嘅高層，一九九七至一四年間擔任董事，曾經為Apple同Google嘅發展出謀獻策，亦做過多間科企顧問，係唔少IT猛人嘅師傅，facebook營運總監桑德伯格、著名風險投資者霍洛維茨都有為佢致哀。
余絲韻