絲絲講場：未算癲 恒大CEO日薪46萬

邊位？就係恒大（03333）CEO夏海鈞。點知？係恒大本二○一五年年報話絲絲知嘅。

夏海鈞舊年年薪一下就跳升到1.68億元人民幣，短短一年就足足急增咗1.31倍。如果以日日開工計（做得CEO，睇怕無時無刻都顧住公司嘢喇啩），日薪可以高到成46.02萬元人仔！今勻內企打工皇帝會唔會就係屬於夏海鈞呢？

騰訊無名氏打低夏總

世事邊有咁易看得透！真正嘅打工皇帝，可能潛伏喺騰訊（00700）入面。

騰訊二○一五年年報顯示，公司入面有位神級打工天皇，舊年年薪竟然係至少2.74億港元！除開計日薪係75.06萬港元，堪稱打工仔嘅終極典範，恨死唔少香港人。

咁究竟呢位神級打工天皇係何許人？騰訊年報就無開名，只係將呢位無名氏列入「最高薪酬人士」，薪酬範圍介乎2.74億至2.745億港元，年薪仲高過公司總裁劉熾平嘅7,497萬元人民幣。

到底係邊個？貼士係，佢唔係董事局中人。

聯想CEO壓軸 有望冧莊

如果退而求其次，齋計上市內地公司CEO，恒大夏海鈞可以問鼎二○一五年度最高薪上市內地公司CEO寶座嗎？

呢層都仲要問埋聯想（00992）CEO兼主席楊元慶先得，事關楊元慶二○一四年度曾以年薪近1.3億元人民幣，勇奪中國上市公司薪酬最高CEO嘅榮譽。所以要等埋聯想新一份年報出爐，至知邊位先係King of Kings。

余絲韻