Market Insight：電力股負面因素多

紐約期油在亞洲時段曾跌逾6%，但在港股收市時跌幅已收窄至4.4%，似乎驚嚇度不算大。其實在油國話召開會議之前，唔少人經已唔睇好會議結果，惟油價仍一路挾上，投機多過基本因素。油國向來各懷鬼胎，伊朗一早話明唔會凍產，但沙特臨尾縮沙，明顯係想將個鑊卸畀伊朗。

雖然話談判桌大門依然打開，但觀乎伊朗及沙特的態度，似乎幾難有彎轉。沙特有成本低優勢，而且明白到今時唔同往日，依家有頁岩油嚴重威脅，加上其他再生能源，全球經濟L型發展，爭取市佔率更實際。儘管油價跌幅低過預期，但相信短期好難重上40美元樓上，油股及航空股等要重新計數。至於股市雖二仔底追隨油價，惟近期可望逐步脫鈎。

「五大」數據更具啟示

股市較油價強勢與「中國經濟軟着陸」有一定關係，姑勿論是否虛火，至少難得一見經濟數據全面回升。最誇張當然係個70大中城市樓價，當中有62個按月上升。不過，內房昨未因數據靚而跟炒，畢竟大城市已出限炒新政，二三線庫存高難成氣候。

另一標青數據是首季發電量上升3.2%，遠高於去年全年0.5%之升幅。發電量被喻為難以造假，且是工業回暖的信號。然而，昨日華能國際（00902）公布首季發電量同比跌6.76%，平均上網電價更跌10.69%，據公司解釋是首季全社會用電低速增長，另雨水充足及新核電機組投產，令水電及核電擠壓了火電的空間。

古勝一向寧信上市公司的經營數據，五大電力集團有相當大代表性，且看其餘電力股公布的數據有何啟示。華能昨跌4.76%，其餘跌幅於1至2%之間，而煤炭股亦受拖累，中煤（01898）和兗煤（01171）分別跌3.7%和2.5%。

電力股今年面對的經營環境顯然差過去年，而今年初電力股估值跌至歷史新低，無論市盈率及周息率都同銀行股一樣咁「吸引」，當時還可「貪平」，但近月隨大市回升後，最大吸引力剩得息率全港最高（尤其內銀股價上升及減派息後）。然而，見到華能數據之令人失望，投資者亦不宜對該板塊存有希望。

「翠如BB股」（08217）近日掀起缸邊話題，但睇成交就知道股民只係眼看手勿動。神州方面有隻正宗明星股，乃范冰冰旗下間公司愛美神被深圳上市公司唐德影視高價收購，計算公司估值高達7億元人仔，連深交所都話關注交易。一套成功劇集可以帶來極高價值，像《太陽的後裔》甚至可提升國家形象，范冰冰套《武媚娘》亦曾帶挈唐德賺個盆滿缽滿。不過，投資喺一個明星身上，始終屬高風險！

彩票股憧憬好消息

內地互聯網彩票業務去年四月被叫停，令彩票股陷入低迷時期，去年度業績普遍錄得虧損。然而，昨日傳來內地計劃在今年內重推互聯網彩票試點的消息，刺激一眾彩票股逆市炒上，以中彩網通（08071）升得最多，升15.6%，第一視頻（00082）、華彩（01371）及匯彩控股（01180）升幅介乎5.8至8%。

據悉，彩票主管部門正研究互聯網彩票及電話彩票管理辦法，年內將有限、適時地推動互聯網彩票試點，企業需要通過國家福彩中心及體彩中心審核，先有機會成為試點。今年有多項大型全球體育賽事舉行，六月有歐洲國家盃，而八月就有巴西奧運，可以話係一個大商機。

走勢上，華彩昨日股價裂口上升，目前多條平均線匯集在0.3元水平，守此支持位，若有明確政策消息出台配合，有望挑戰0.4元。

古勝