絲絲講場：fb五個新表情值千億?

話說facebook二月廿四日推出Reactions功能，多咗5個新Emoji後，公司股價由105.46美元升到上周五計（十五日）111.54美元，升咗近4%。即是兩個月未夠，「Love」、「Haha」、「Wow」、「Sad」同「Angry」呢5個Emoji公仔，帶挈公司市值多咗近119億美元（即是928億幾港元）！除開計，每個公仔平均創富185億幾港元！

AI同VR有份撐股價

嗱，又唔好畀五個公仔搶晒功。事關facebook上星期喺三藩市舉行開發者大會，創辦人朱克伯格講未來10年願景，話未來重點搞人工智能（AI）同虛擬實境（VR），市場受落，股價谷起，AI同VR都有功勞。

講開又講，呢啲咁值錢嘅Emoji公仔，真係要好小心用，事關你點用法，顯示緊你係點嘅人。

研究顯示，自覺隨和可親嗰啲，特別鍾意用Emoji，仲多數係開心笑公仔（注意！係自己覺得自己係嗰隻，絲絲直譯，就係「你見唔見我幾咁隨和可親啫」嗰種）。

Sad出面 懶理人目光

至於唔介意人哋點睇嗰啲，相對用多啲「Sad」公仔，事關佢哋唔怕畀人知佢咩Mood，最緊要係表達情緒（絲絲直譯，就係「我有我感受，你理得我，但我係要你知呀」嗰種）。

人哋又點睇用家？微笑公仔愈用得多，就畀人感覺愈隨和、愈認真誠實、愈接受新嘢。不過，用嗰個就未必係咁睇自己，甚至真身亦未必真係咁。

睇住facebook依家股價咁，唔知朱克伯格又會用邊個Emoji公仔來表達呢可？

余絲韻