絲絲講場：黃國英個騷有「回水機制」

黃國英話，過去三次棟篤笑都冇試過有觀眾在場嗌回水，一來可能觀眾錫住佢，二來買飛入場前大家都預咗內容有啲乜。

轉個彎Sell自己隻「芬」

不過時移世易，佢話為提升顧客服務，回水係有可能！佢笑住話「買我隻Fund，我咪回水畀你囉！」

Well，黃國英隻基金入場費要成十萬美金！睇番隻基金表現，年初至今雖然跑輸同業啲啲，但過去一年同三年都跑贏同業8個百分點以上。

佢話每次做完Show，都有好多客幫襯佢開戶，令佢有重新出發嘅感覺，所以通常搞完棟篤笑佢都會充滿力量去幫客戶跑數。

就快爆騷唔使再谷

今次呢齣「財力覺醒」六月十一日就開Show，聽講依家只賣剩300張飛，由於剩飛唔多，唔使再谷宣傳，相信埋單時成本可以比兩年前嗰次慳番十萬八萬。

絲絲記得，佢兩年前好似話過日睇港股、夜炒美股、仲要搞Show，實在太忙太辛苦咁話。咁今次又搞？佢話「依家有幾忙啫，個市咁鬼靜，啱晒啦」，黃國英唔忙？講真定講笑？

余絲韻