硅谷最近有難，要靠「IT師奶」打救。
話說硅谷好多IT公司有工冇人做，依家諗計，想搵番嗰班喺90年代尾至千禧年間去咗結婚生仔嘅女IT人，呢班「IT師奶」家陣仔大女大，正好可以解決硅谷人才荒。連PayPal主席約翰‧多納霍（John Donahoe）都認話，吸納「IT師奶」回歸職場，係提升人才競爭力有效方法。
協助「IT師奶」回歸亦成為當地人力資源顧問公司新商機，有顧問公司就同IBM與Apple呢啲科技巨頭合作，推出叫「ReBoot」嘅再培訓就業計劃，幫啲「IT師奶」重新掌握最新技術，補番佢哋離開咗科技行成10年嘅空白，變身IT生力軍。
絲絲未嚟得切為班「IT師奶」開心時，又見到話微軟同facebook早兩日咁啱一齊宣布，話實現男女員工同工同酬。咁都竟然係新聞，真係有啲悲哀。
余絲韻